د کونړ د مرافعه محکمې رئیس د خاص کونړ له ابتدائیه محکمې څخه لیدنه وکړه
د چهار شنبه په ورځ (۱۰ /۷ /۱۴۴۴ هـ ق) نېټه د کونړ ولایت د مرافعه محکمې رئیس محترم مولوي عزیزالرحمن او ورسره مل پلاوي د خاص کونړ له ابتدائیه محکمې څخه لیدنه وکړه.
د خاص کونړ ابتدائیه محکمې رئیس محترم عبدالخالق یاد پلاوي ته پر ښه راغلاست سربېره د مرافعه محکمې د دغه پلاوي سفر په اجراآتو کې د شفافیت او د هیوادوالو موضوعاتو ته پر وخت د رسېدنې په برخه کې لوی اقدام وباله او زیاته یې کړه، که د محاکمو د اجراآتو څخه وخت پر وخت لیدنه وشي نو د محاکمو اجراآت به پر وخت او په شفاف ډول پر مخ ولاړ شي.
دغه راز د کونړ د مرافعه محکمې رئیس د یادې محکمې اداري او قضائي کارونه له نیږدې وکتل او د شته ستونزو د حل لپاره یې د مربوطه محکمې مسؤولینو ته لازمې لارښوونې وکړې.
پر دې سربېره د مرافعه محکمې رئیس د سترې محکمې د دارالانشاء عمومي ریاست د صادرو شویو متحدالمآلونو د تطبیق څارنه هم وکړه، د یادې ابتدائیه محکمې د تجهیزاتو په تړاو تفصیلي خبرې اترې وشوې او د مرافعه محکمې د رئیس له لوري د شته ستونزو د هواري په برخه کې ډاډ ورکړل شو.
د سفر په پای کې د مرافعه محکمې رئیس حاضرۍ ته په پابندۍ، له مراجعینو سره په ښه چلند، په اجراآتو کې پر شفافیت او د فساد د مخنیوی په هکله جدي سپارښتنې وشوې.
