د سترې محکمې د جزا دېوان عمومي رئيس د امارتي ادارو د مسؤولینو ترمنځ د همغږۍ د لا تقویې په موخه خوست ولايت ته سفر وکړ

د سترې محکمې د جزا دېوان عمومي رئيس محترم مفتي عتيق الله (دروېش) د سترې محکمې د رئیس او قاضي القضات محترم شیخ عبدالحکیم (حقاني) صاحب په ځانګړي هدایت په ۱۶/ ۱/ ۱۴۴۶ هـ ق نېټه د امارتي ادارو د مسؤولینو ترمنځ د همغږۍ د لا تقویې او یو شمېر جزائي دوسیو د حل او فصل په موخه خوست ولایت ته سفر وکړ.
د جزا دېوان عمومي رئیس د یاد سفر پر مهال چې مفتي عبدالحی (شاکر) یې ملتیا کوله د خوست له والي، مرستیال والي، امنيه قوماندان، ولسوالانو، د امربالمعروف، نهی عن المنکر او شکایاتو د اورېدو، د علماوو شورا او د استخباراتو له رئيسانو او نورو اړوند امارتي ادارو له مسؤولینو سره د ولایت مقام په تالار کې وکتل.
محترم مفتي عتیق الله (دروېش) یادې غونډې ته د خبرو پر مهال د ټولو امارتي ادارو له مسؤولینو غوښتنه وکړه چې د چارو د ژر او اصولي ترسره کولو په موخه دې له یو بل سره د اصولو په رڼا کې قوي همغږي ولري، ځکه د ځینو چارو ترسره کول د څو ادارو له همغږۍ او همکارۍ پرته ناشوني دي.
دغه راز نوموړي زیاته کړه، ټول ولایتي مسؤولین دې د هېوادوالو ستونزو ته پر وخت رسېدنه کوي، له مراجعینو سره دې نېک چلند کوي او په خپل ټاکلي وخت دې دندو ته حاضرېږي.
په دې سربېره د خوست محترم والي، د علماوو شورا، مرافعه محکمې رئیسانو او یو شمېر نورو مسؤولینو هم له یو بل سره د غوره تعامل، همکارۍ او همغږۍ پر ګټو تفصیلي خبرې وکړې او ټولو ژمنه وکړه چې په دې برخو کې هر ډول اصولي اجراآتو او همکاریو ته ژمن دي.
دغه راز د سترې محکمې د جزا دېوان عمومي رئیس له دې غونډې وروسته په خوست ولایت کې دوې مهمې جزائي دوسیې هم حل او فصل کړې.
محترم مفتي عتیق الله (دروېش) د دغه سفر پر مهال د خوست له مرکزي زندان څخه هم لیدنه وکړه او د جزائي موضوعاتو اړوند زندانیانو څخه یې د دوی د وضعیت او نورو مواردو پوښتنه وکړه.