د سترې محکمې امنیتي او اجرائیوي چارو عمومي ریاست د ملکي محاکمو د امنیتي قطعاتو عمومي قوماندان درېیو ولایتونو ته رسمي سفر وکړ

د سترې محکمې د امنیتي او اجرائیوي چارو عمومي ریاست د ملکي محاکمو د امنیتي قطعاتو عمومي قوماندان، محترم الحاج مولوي مطیع الله (فاروقي) د یوه پلاوي په ملتیا، د ۱۴۴۸هـ ق کال د جمادی‌ الأولی میاشتې په ۹مه، ۱۰مه او ۱۱مه نېټه کندوز، تخار او بدخشان ولایتونو ته د ملکي محاکمو د امنیتي قطعاتو د چارو د ارزونې او کتنې په موخه رسمي سفر وکړ.
د محترم الحاج مولوي مطیع الله (فاروقي) او ورسره مل پلاوي، د دغه سفر عمده موخې د یادو ولایتونو د ملکي محاکمو د امنیتي قطعاتو د چارو له نږدې څارنه او ارزونه، د امنیتي وضعیت لا ښه‌والي، د شته ستونزو او اړتیاوو تشخیص او د قضائي او امنیتي ادارو ترمنځ د همغږۍ او همکارۍ پیاوړتیا وه.
د سترې محکمې د امنیتي او اجرائیوي چارو عمومي ریاست د ملکي محاکمو د امنیتي قطعاتو عمومي قوماندان د دغه سفرونو پر مهال د کندوز، تخار او بدخشان ولایتونو د مرافعه، ښاري ابتدائیه او ولسوالیو د ابتدائیه ملکي محاکمو د امنیتي قطعاتو له مسئولینو او منسوبینو سره جلا جلا غونډې وکړې‎.
په یادو غونډو کې د محاکمو د امنیتي وضعیت، د قضاتو او قضائي تأسیساتو د امنیت د تأمین، د امنیتي چارو د لا ښه‌والي او د موجوده اړتیاوو او ستونزو د حل په اړه هر اړخیز بحثونه او د نظرونو تبادله وشوه.
دغه راز د ناستې ګډونوالو د امنیتي قطعاتو او د محاکمو د قضائي غړو ترمنځ پر لا زیاتې همغږۍ، د شته ستونزو پر حل او د محاکمو د امنیت د لا ښه تأمین په موخه د اړینو تدابیرو پر نیولو ټینګار وکړ.
په دې سربېره محترم الحاج مولوي مطیع الله (فاروقي) د یادو ولایتونو، امنیه قوماندانیو، مرافعه او ښاري ابتدائیه محاکمو او دې محاکمو اړوند دېوانونو له مسئولینو سره جلا لیدنې وکړې.
د یادونې وړ ده، چې د دغه رسمي سفر پر مهال د سترې محکمې د امنیتي او اجرائیوي چارو عمومي ریاست د پلاوي مسلکي مسئولینو د یادو ولایتونو د ملکي محاکمو امنیتي مجاهدینو ته لنډ نظامي او عقیدوي درسونه هم ورکړل؛ په دغو درسونو کې د شرعي او نظامي آدابو ارزښت، د وسلو د ساتنې او کارونې اصول، د تالاشۍ او پهره‌دارۍ اړوند شرایط، له قضاتو، اداري مسئولینو، نورو منسوبینو او مراجعینو سره د ښه چلند او مناسب تعامل څرنګوالی او پنځه وخته لمانځه ته د پابندۍ موضوعات شامل وو.
د غونډو په پای کې محترم الحاج مولوي مطیع الله (فاروقي) پر متقابل درناوي، دوامدارې همغږۍ، د مسئولیتونو ترمنځ د ګډې همکارۍ پر اهمیت ټینګار وکړ او اړوندو مسئولینو ته یې سپارښتنه وکړه، چې د قضاتو، قضائي مراجعو او محاکمو د تأسیساتو د امنیت د لا ښه تأمین په موخه خپلې هڅې او همغږۍ لا پیاوړې کړي.