د سترې محکمې اړوند جنوب لوېدیځ زون قضائي مرستيال د روزګان ولايت له مرافعه محکمې څخه لیدنه وکړه
د سترې محکمې اړوند جنوب لوېدیځ زون قضائي مرستيال محترم شيخ نور الله (منير) صاحب؛ په ۲۹/ ۴/ ۱۴۴۷ هـ ق نېټه د روزګان ولايت له مرافعه محکمې څخه ليدنه وکړه.
د ليدنې په پيل کې محترم شيخ صاحب د مرافعه او ښاري ابتدائيه محاکمو رئیسانو، د دېوانونو رئیسانو، قضائي غړو، د ثبت اسناد او وثایقو آمریت کارکوونکو، اختصاصي محکمې رئيس او له ټولو اداري کارکوونکو سره غونډه وکړه.
غونډه د ښاري ابتدائیه محکمې مدني دېوان مفتي احمدشاه لخوا د قرآنکریم د څو مبارکو آیاتونو په تلاوت پيل شوه؛ ورپسې د مرافعه محکمې رئيس محترم شیخ محمود (ابوالفیض) راغلي پلاوي ته ښه راغلاست ووایه او مننه یې وکړه چې زموږ د محاکمو اجراآتو څخه مو له نږدې لیدنه ترسره کړه.
د غونډې په دوام قضائي مرستيال محترم شیخ نور الله (منیر) صاحب د قضاء پر اهمیت، مسؤولیت او عدالت خبرې وکړې وویل، قضاء یا محکمه د اسلامي نظام یوه دروازه ده، داسې عدالت پکې ترسره کړئ، لکه څنګه چې د الله (جل جلاله) په کتاب کې ذکر شوی دی، باید دروازه ټول وخت او د ټولو پر مخ خلاصه وي او عدالت پکې ښه تطبیق شي.
محترم شیخ منير صاحب زیاته کړه، د ښاري ابتدائیه محکمې کوم قاضي صاحب چې فیصله کوي باید ښه دقیق ورته متوجه شي؛ ځکه دا ستاسې مسؤولیت دی، نو کوم مسؤولیت چې در وسپارل شو، هغه باید ښه په ایماندارۍ ترسره کړئ، کوم وخت چې فیصله کوئ که چېرته دوه ساعته وخت غواړي، تاسو باید درې ساعته وخت ورکړئ او ښه په دقیق ډول یې جوړه کړئ، چې بیا وروسته د لوړو محاکمو له خوا نقض نه شي، څه وخت چې موضوع درته راغله باید ښه وکتل شي چې زما اړوند دی او کنه؟
د غونډې په پای کې ټولو قضائي غړو او اداري کارکوونکو ژمنه وکړه چې ټولې سپارښتنې به عملي کوو.
غونډه د اختصاصي محکمې رئيس د دعاء په ويلو پای ته ورسېده.
