د سترې محکمې قضائي زده کړو عمومي ریاست لخوا په قضائي بستونو کې د تازه مقررېدونکو کسانو لپاره درې میاشتنی علمي او عملي سیمینار پیل شو
د سترې محکمې اړوند قضائي زده کړو عمومي ریاست کې په (۲۵/۵/۱۴۴۶ هـ ق) نېټه د قضاء، افتاء او تحریر برخه کې د ظرفیت لوړونې په موخه هغه علماء کرامو ته چې د درې ګونو محاکمو قضائي بستونو کې پر دندو ګمارل کېږي درې میاشتنی سیمینار پیل شو.
دغه قضائي سیمینار چې د هېواد د بېلا بېلو ولایتونو شاوخوا (۲۱۰) کسانو په کې ګډون درلود، د قرآنکریم د مبارکو آیاتونو په تلاوت پیل شو، ورپسې د قضائي زده کړو عمومي ریاست استاد محترم شیخ قیام الدین قانت د سیمینار په اړه هر اړخیزه وینا وکړه وویل، په دغه قضائي سیمینار کې به د مسلکي استادانو او علماء کرامو لخوا د قضاء او افتاء برخه کې ضروري او اساسي مضامین تدریس کېږي.
شیخ صاحب زیاته کړه، دغه سیمینار به دوې (نظري او عملي) برخې لري، په عملي برخه کې د سیمینار په ګډونوالو د تدریس شوو مسایلو عملي کار کېږي، دوی ته د حل او فصل په موخه قضائي موضوعات ورکول کېږي او بیا یې پارچې کتل کېږي.
د سیمینار ګډونوالو د سترې محکمې له عالي مقام څخه مننه وکړه چې دوی ته یې د قضاء او افتاء برخه کې د دغه مهم او ګټور سیمینار د جوړېدو فرصت برابر کړی دی.
