په خوست ولایت کې پر یو تن قاتل د قصاص الهي حکم تطبیق شو
بسم الله الرحمن الرحيم
الحمد لله وكفى والصلوة والسلام على عباده الذين اصطفی، اما بعد:
قال الله تبارك وتعالى: وَلَكُمْ فِي الْقِصَاصِ حَيَاة يا أولي الألباب لَعَلَّكُمْ تَتَّقُونَ (البقرة: ۱۷۹)
ژباړه: ستاسو لپاره په قصاص کې ژوند دی، اې د عقل خاوندانو د دې لپاره چې تاسو تقوا حاصله کړئ.
و ايضاً قال الله تعالى: وَمَن قُتِلَ مَظْلُومًا فَقَدْ جَعَلْنَا لِوَلِيْهِ سُلْطَانًا فَلَا يُسْرِف فِي الْقَتْلِ - إِنَّهُ كَانَ مَنصُورًا (الاسراء: ۳۳)
ژباړه: او څوك چې مظلوم وژل شوى وي، د هغه وارث ته موږ د غچ غوښتنې (قصاص) حق ورکړی دى، نو پكار ده چې هغه په وژلو کې له حده تېرى ونه کړي، له هغه سره به مرسته وشي.
نن ورځ د خوست ولایت مرکز ورزشي لوبغالي کې په یو تن قاتل باندې د الله (جلجلاله) حکم (قصاص) تطبيق شو.
دغه قاتل چې يو کس يې د کلاشینکوف په واسطه په قتل رسولی و، شهرت يې په لاندې ډول دی:
د قاتل نوم منګل ، د طلاخان زوی، د رحمت خان لمسی، د پکتیا ولایت د سیدکرم ولسوالۍ د "سجنک" سیمې اصلي او د خوست ولایت د علیشیرو او تریزیو ولسوالۍ د کوزې ابوخانې سیمې فعلي اوسېدونکی دی، د مقتول عبدالرحمن د ظابط زوی، د علي خان لمسي د خوست ولایت د عليشیرو او تریزیو ولسوالۍ د کوزې ابوخانې سیمې اصلي او فعلي اوسېدونکي د عمدي قتل په پېښه کې نيول شوی و.
یاده موضوع د اسلامي امارت د سترې محکمې اړوند درې ګونو محاکمو (ابتدائیې، مرافعې او تمیز) لخوا په خورا دقیق او مکرر ډول وڅېړل شوه؛ چې په پايله کې پرې د قصاص حکم صادر او تائید شو، وروسته دغه حکم د اسلامي امارت د زعيم عاليقدر اميرالمؤمنين شيخ الحديث مولوي هبة الله اخندزاده (حفظهالله) حضور ته د تائید لپاره وړاندې شو.
د عاليقدر اميرالمؤمنين (حفظهالله) لخوا هم د دغې موضوع په اړه د وروستي احتیاط په موخه فوق العاده څېړنه وشوه، د مقتول کورنۍ ته د بخښنې او سولې لپاره وړانديز شوی و، د هغوی له نه منلو او انکار وروسته په قاتل باندې د قصاص شرعي حكم د تطبيق امر ورکړل شو او د دغه حکم د تطبیق لپاره د ملک سترې محكمې ته هدایت وشو، چې دغه د قصاص حکم نن سه شنبه (د ۱۴۴۷هجري قمري کال د جمادی الآخرة میاشتې په ۱۱مه) نېټه د خوست ولایت د مرکز په ورزشي لوبغالي کې د عام ولس په یوه مجموعه کې تطبیق کړي.
د قصاص د ترسره کېدو په موخه د ملک د قاضيالقضات محترم شيخ عبدالحکيم (حقاني) صاحب په هدایت د سترې محکمې د جزا دېوان عمومي رئیس محترم مفتي عتیق الله (دروېش) صاحب د يوه پلاوي په ملتیا خوست ولایت ته لېږل شوی و.
په دې غونډه کې د خوست ولایت د مرافعه محکمې رئيس محترم مولوي عین الله (خلیل)، د خوست والي محترم مولوي عبدالله (مختار)، د نورو امارتي ادارو ګڼ شمېر مسؤولينو او په زيات شمېر عامو خلکو ګډون کړی و.
د غونډې په پای کې په ملک کې د سرتاسري امنیت د لا ټینګښت، د خلکو شرعي حقونو ته د لا رسېدو او د اسلامي شریعت د لا ښه تطبيق لپاره دعاء وشوه؛ غونډه د قاتل په وژنه او په دې اړوند د الله تعالی د ستر حکم قصاص په تطبیق پای ته ورسېده.
د یادونې وړ ده چې د قتل په دې قضیه کې درې ګونو محاکمو او د اسلامي امارت د مشرتابه محترم عالي مقام پر دوو نورو مجرمینو هم د قصاص الهي حکم د تطبیق امر کړی؛ خو دا چې د مقتولینو ځینې وارثین له ملک څخه بهر استوګن او دلته موجود نه دي؛ نو د شرعي احکامو له مخې پر دغه مجرمینو د قصاص الهي حکم تطبیق د مقتولینو د وارثینو تر حاضرېدو معطل شو.
