د سترې محکمې اړوند جنوب لوېديځ زون قضائي مرستيال د هلمند ولايت له محاکمو څخه لیدنه وکړه

د سترې محکمې اړوند جنوب لوېدېځ زون قضائي مرستيال محترم شیخ نورالله (منیر) صاحب، د نظامي معاونیت قضائي غړي مولوي محمدهاشم (الهام)، مفتي فضل الله (عاصم)، د جنوب لوېديځ زون قضائي تفتیش غړي شیخ محمد لعل، مولوي عطاء الرحمن، د جنوب لوېديځ زون د تمیز عالي ریاست تجارتي دېوان مفتي مولوي مغفور الله او یو شمېر نورو غړو په ملتیا، د ۱۴۴۷هـ ق کال د ذوالقعدة الحرام مياشتې په ۱۹مه او ۲۰مه نېټه، د هلمند ولايت له مرافعه، ښاري ابتدائیه، نظامي او اختصاصي محاکمو څخه لیدنه وکړه.
په پیل کې قضائي مرستیال محترم شیخ نور الله (منیر) صاحب د هلمند ولایت ټولو قضائي، اداري، خدمتي او نظامي مسؤولینو سره په یوه غونډه کې وکتل.
محترم شیخ منیر صاحب د غونډې ګډونوالو ته د قضاء، مسؤولیت اداء کولو او په دنده کې د اخلاص اړوند مهمه وینا وکړه وویل، په محاکمو کې چې هر چاته کومه دنده او مسؤولیت ورسپارل شوی وي، هغه که په قضائي، اداري او یا هم امنیتي برخه کې وي، باید ټول په پوره اخلاص او امانتدارۍ سره خپلو مسؤولیتونو ته رسېدنه وکړو، د مراجعینو ستونزې او موضوعات واورو او ورته د شرعي او قضائي اصولو په رڼا کې رسېدنه وکړو.
ورپسې قضائي مرستيال او ورسره مل هیئت د یادو ټولو محاکمو د ریاستونو، دېوانونو او ادارو څخه له نږدې لیدنه وکړه، د دوی چارې یې وکتلې، اړتیاوې یې واورېدې او د حل ډاډ یې ورکړ.
د ليدنې په وروستيو کې د یادو محاکمو مسؤولینو له ورغلي هیئت څخه خوښي څرګنده کړه، چې د دوی حال اخلي، ستونزې یې اوري او د حل په موخه یې اړوند مراجعو ته سپارښتنه کوي.