د زابل د مرافعه محکمې عمومي رئيس په مشرۍ اداري غونډه ترسره شوه
د ۱۴۴۵هـ ق کال د جمادی الأولی مياشتې په ۲۷مه نېټه د زابل ولایت د مرافعه محکمې محترم رئيس مفتي عبدالجليل (سفيان) په مشرۍ او د ياد رياست د دېوانونو، آمريتونو د مسؤولينو، د دېوانونو غړيو او د ښاري محکمې د رئيس په شتون کې اداري غونډه ترسره شوه.
ياده غونډه د قرآنکريم د څو مبارکو آياتونو په تلاوت پيل شوه؛ ورپسې د مرافعه محکمې محترم رئيس د غونډې ګډونوالو ته د ښه راغلاست ترڅنګ په چارو کې د بريا غوښتنه وکړه.
نوموړي د خپلو خبرو پر مهال وويل، موږ او تاسو باید د کارونو د ښه اجرا او پر وخت تر سره کېدو لپاره د اصولو مطابق پر ټاکلي وخت خپلو وظيفو ته حاضر او پر ټاکلي وخت له دندو څخه رخصت شو، څنګه چې د مشرانو له لوري په هره اداره کې د ښه نظم لپاره د حاضرۍ کتاب اېښودل شوی، باید حاضرۍ ته جدي پاملرنه وشي، همداراز د دې لپاره چې زموږ او تاسو کارونه منظم شي بايد د فيصلو په ترتيب کې د اړوند دېوان يا ابتدائيه محکمې مسؤولين په ګډه د فيصلې مسوده جوړه کړي، وروسته يې محرر ته د فيصلې د ترتيب او نهايي ليکنې په هدف ورکړي، هغه به يې صفا او واضح ډول وليکي او فيصله به آماده کړي.
د غونډې په دوام محترم رئيس د مرافعه محکمې رياست اړوند مخزن د ښه حفاظت او ساتنې لپاره د وثايقو آمريت آمر ته هدايت وکړ چې مخزن ته بايد جدي پاملرنه وکړئ، ترڅو په مخزن کې پراته اسناد محفوظ وساتل شي، مخزن بايد د يو ځانګړي پلاوي له لوري د وثايقو آمر په مشرۍ د ضرورت پر وخت خلاص او بېرته مهرلاک شي.
د غونډې په وروستۍ برخه کې د چارو د ښه سمون په موخه د غونډې ګډونوالو خپل نظرونه وړاندې کړل او ياده غونډه د دعاء په ويلو پای ته ورسېده.
