د سترې محکمې د جزا دېوان عمومي رئیس په هڅو په خوست ولایت کې د دوو کورنیو ترمنځ (۳۰) کلنه دښمني د سولې له لارې حل شوه

د سترې محکمې د جزا دېوان د عمومي رئیس محترم مفتي عتیق الله (دروېش) او ورسره مل پلاوي په هڅو او ترغیب او د خوست ولایت د قومونو او قبایلو چارو ریاست د مسئولینو په منځګړیتوب، د روان ۱۴۴۸هـ ق کال د ربیع الأول میاشتې په ۲۴مه نېټه د دوو کورنیو ترمنځ (۳۰) کلنه دښمني، د سولې له لارې حل او فصل شوه.
دغه موضوع، چې د ځمکې پر سر د شخړې له امله رامنځته شوې او په نتیجه کې یې څلور کسان وژل شوي هم وو، ابتدائیه محکمې ته تر راجع کېدو وروسته په غور او دقت څېړل شوې او په اړه یې شرعي پرېکړه صادره شوې وه. 
وروسته د دوسیې د یوه جانب د مرافعه غوښتنې په اساس د خوست ولایت مرافعه محکمې د جزا دېوان هم دغه موضوع څېړلې او په تړاو یې د ابتدائیه محکمې لخوا صادره شوې پرېکړه تائید کړې وه.
دغه موضوع د تمیز غوښتنې په موخه د تمیز عالي ریاست د جزا عمومي دېوان ته راجع او دغه دېوان یې په اړه لازمې پلټنې ترسره کړې.
د جزا دېوان عمومي رئیس او ورسره مل پلاوي، خوست ولایت ته د دې په اړه د وروستیو څېړنو پر مهال د موضوع طرفین سولې ته ترغیب او وهڅول، چې طرفینو د یاد ولایت د قومونو او قبایلو چارو ریاست د مسئولینو په منځګړیتوب له یو بل سره سوله وکړه او دغه اوږدمهاله دښمني یې په رسمي دول حل او پای ته ورسېده.