د کاپیسا ولایت مرافعه محکمې رئیس په مشرۍ اداري غونډه وشوه

د کاپیسا ولایت مرافعه محکمې عمومي رئیس محترم مولوي عزیزالرحمن (حقاني) په مشرۍ؛ په ۱۴/ ۵/ ۱۴۴۷هـ ق نېټه د ټولو ابتدائیه محاکمو، مرافعه او ښاري ابتدائيه محاکمو دېوانونو او اختصاصي محکمې رئیسانو، د حقوقو، مرافعه او ښاري ابتدائیه محاکمو د تحریراتو آمرینو په ګډون، اداري غونډه وشوه.
غونډه د تګاب ولسوالۍ ابتدائیه محکمې رئیس مولوي محمد جاوید لخوا د قرآنکريم د څو مبارکو آیاتونو په تلاوت پیل شوه؛ ورپسې د مرافعه محکمې رئیس د محاکمو د لا پرمختګ، مراجعینو سره د نېک چلند، د ستونزو حل، د حاضرۍ په پابندۍ، د محاکمو د غړو ترمنځ پر قوي همغږۍ او د دوسیو څېړنه په خپل ټاکلي وخت په اړه تفصیلي خبرې وکړې.
نوموړي په خپلو خبرو کې وویل، اسلامي امارت شرعي نظام د لکونو شهداوو د مقدسو وینو محصول او پر افغانانو د الله (جل‌جلاله) ستر نعمت دی، د دغه نظام بنسټ عدل او انصاف دی، نو باید موږ او تاسو په خپلو پرېکړو کې عدل او انصاف په نظر کې ونيسو.
د غونډې په دوام د ښاري ابتدائیه محکمې رئیس محترم مولوي عبدالروف (سعادت) په بېلا بېلو موضوعاتو بحث وکړ وویل، ټول قاضي صاحبان دې په خپلو اجراآتو کې اداري او حقوقي اصولنامه په نظر کې ونیسي، ترڅو د محاکمو کارونه په ښه ډول مخته لاړ شي او د مراجعینو سرګرداني ختمه شي. 
د غونډې په وروستيو کې ګډونوالو خبرې وکړې، د یادو توصیو په عملي کولو او د مافوق آمراوو اطاعت څرګندولو تر څنګ یې ځینې موضوعات او خپلې اړتیاوې د مرافعه محکمې له رئیس سره شریکې کړې، د مرافعه محکمې رئيس ډاډ ورکړ چې له تاسو سره هر ډول همکارۍ ته چمتو يو. 
غونډه د دعاء په ویلو پای ته ورسېده.