د ستری محکمی د جنوب لوېدیځ زون قضائي مرستیال روزګان ولایت ته سفر وکړ
د سترې محمکې د جنوب لوېديځ زون قضائي مرستیال محترم شیخ نورالله (منیر) صاحب، د نظامی معاونیت د قضائي غړو مولوي محمدهاشم (الهام) او مفتي فضل الله (عاصم)، د قضائي تفتیش عمومی ریاست غړو شیخ محمدلعل (حقاني)، مولوي عطاءالرحمن (عاصم)، د جنوب لوېدیځ زون د تمیز عالی ریاست تجارتي دېوان مفتي مغفورالله او یو شمېر نوروغړو په ملتیا، د خپلو ولايتي سفرونو په دوام د ۱۴۴۷هـ ق کال د ذوالحجةالحرام میاشتې په ۲۹مه او۳۰مه نېټه روزګان ولایت ته سفر وکړ.
قضائي مرستیال د دغه سفر په پیل کې د یاد ولايت مرافعه، ښاري ابتدائیه، نظامي او اختصاصي محاکمو ترڅنګ د وثايقو او حقوقو له آمریتونو څخه لیدنه وکړه.
ورپسې یې د یادو محاکمو له مسؤولینو سره غونډه وکړه؛ دغه غونډه د مرافعه محکمې جزا دېوان د رئیس مفتي دوست محمد (سعید) لخوا د قرآنکریم د څو مبارکو آیاتونو په تلاوت پیل شوه، وروسته محترم شیخ نورالله (منیر) صاحب او ورسره مل هيئت له قضائي، اداري، خدمتي او نظامي مسؤولینو او منسوبینو سره وکتل او د قضائي او نورو چارو د لا ښه تنظیم، اجراآتو د چټکتیا، شفافیت، حساب ورکونې او همغږۍ د پیاوړتیا په موخه یې ورته لازمې سپارښتنې او ارزښتناک هدایات وکړل.
د سترې محکمې د جنوب لوېدیځ زون قضائي مرستیال وویل، د عدالت تأمین د اسلامي نظام له مهمو مسؤولیتونو څخه دی او ټول قضائي مسؤولین باید د شرعي احکامو، نافذه اصولو او اسلامی امارت د سپېڅلو ارزښتونو په چوکاټ کې ولس ته په پوره اخلاص او امانتدارۍ سره خدمت وکړي.
محترم شیخ (منیر) صاحب زیاته کړه، د مراجعینو دوسیو او موضوعاتو ته باید په جدي توګه پاملرنه وشي، په بشپړ دقت وڅېړل شي، د شرعي او قانوني اسنادو تر بشپړې ارزونې وروسته دې فيصلې په وخت صادرې شي، تر څو د ولس اعتماد لا پیاوړی او د خلکو حقوق په ښه ډول خوندي شي.
محترم شیخ صاحب وویل، د اسلامي نظام قضائي ارګانونه د عدالت مهمه مرجع ده او د ولس خدمت، د مظلوم لاسنیوی او د حق تأمین هغه ستر مسؤولیتونه دي، چې باید په رښتینولۍ او لوړ احساس يې ترسره کړئ.
