د لغمان ولايت ښاري ابتدائیه محکمې د رئيس په مشرۍ اداري غونډه وشوه
د لغمان ولايت ښاري ابتدائيه محکمې د عمومي رئيس محترم مولوي سلطان محمد (رباني) په مشرۍ؛ د دېوانونو رئيسانو، مفتيانو، محررينو او د تحريراتو عمومي مدیر په ګډون په ۴/۷/۱۴۴۶ هـ ق نېټه اداري غونډه وشوه.
غونډه د قرآنکريم د څو مبارکو آياتونو په تلاوت پيل شوه؛ ورپسې د ښاري ابتدائيه محکمې عمومي رئيس له اجنډا سره سم ګډونوالو ته مهمې سپارښتنې او لازمې لارښوونې وکړې او مسؤولينو ته يې په خطاب یې وويل، له مدعي او مدعي علیه سره به د شرعي احکامو په رڼا کې چلند کوئ، خلک سولې ته وهڅوئ، د قضاء حيثيت وساتئ او ځانونه د قضاتو په اوصافو او آدابو باندې پوره برابر کړئ.
نوموړي زیاته کړه، د مدعي او مدعي عليه دواړو حالت او کړنې پوره وڅارئ او د يوه اړخ له کړنو مه اغېزمنېږئ، د هر دېوان رئيس بايد خپلو ماتحت کسانو ته هدايت وکړي چې له مراجعينو سره ښه او غوره چلند وکړي.
غونډه د دعا په ويلو پای ته ورسېده.
