نن چهارشنبه کندهار ولایت کې شپږو متهمینو ته تعزیري سزا ورکړل شوه
نن چهار شنبې (۱۴۴۴/۱۱/۴ ه ق) نېټه د کندهار ولایت د مرافعه محکمې د جزا دېوان لخوا د افغانستان اسلامي امارت د جنوب غرب زون د تمیز عالي مقام او د سترې محکمې د قضائي معاونیت له هدایت سره سم شپږو متهمینو ته د لواطت او د بل د منکوحه ښځې د تښتولو په وجه په احمد شاهي فوټبال لوبغالي کې تعزیري سزا ور کړل شوه.
د یاد متهمینو دوسیې چې د لواطت او د بل د منکوحه ښځې د تښتولو په وجه نیول شوي وو او په خپلو جرمونو یې پرته له زور او جبره اقرار او اعتراف درلود، د کندهار ولایت د مرافعه محکمې د جزاء دېوان لخوا څېړل شوې وې.
متهمینو ته د تعزیري سزا د تطبیق په مناسبت جوړه شوې غونډه کې د کندهار ولایت د محاکمو او نورو ولایتي ادارو پر مسؤولینو سربېره عامو هیوادوالو هم ګډون درلود.
غونډې ته د کندهار ولایت د مرافعه محکمې عمومي رئیس محترم شیخ عبدالغفار (بحر)، د مرافعه محکمې د جزا دېوان رئیس محترم مفتي فضل الله (عاصم)، د کندهار ولایت مرستیال والي محترم الحاج مولوي حیات الله (مبارک) او نورو مشرانو اصلاحي ویناوې وکړې.
وروسته د مجرمینو شهرت، جرم او د هغوی د تعزیر اندازه بیان او پر یادو کسانو باندې تعزیري سزاء تطبیق شوه او غونډه د دعاء په ویلو سره پای ته ورسېده.
