د سترې محکمې د قضائي زده کړو په عمومي ریاست کې د نظامي محاکمو اړوند قضائي غړو ته ۴۵ ورځنی سیمینار پای ته ورسېد
د سترې محکمې د قضائي زده کړو په عمومي ریاست کې د ټول ولایتونو د نظامي محاکمو اړوند قضائي غړو (قضاتو، مفتیانو او محررینو) ته ۴۵ ورځنی قضائي سیمینار پرون چهارشنبې پای ته ورسېد.
په دغه سیمینار کې چې د سترې محکمې د محترم مقام په هدایت د نظامي محاکمو د قضاتو، مفتيانو او محررینو د قضائي ظرفیت لوړونې په موخه جوړ شوی و، د هیواد د (۳۴) ولایتونو د محاکمو اړوند (۴۶) قضائي غړو ګډون درلود.
د یاد سیمینار ګډونوالو ته د مؤظفو استادانو او شیوخ کرامو لخوا د قضاء مسلک کې عملي او نظري روزنه ورکړل شوه.
د سیمینار ګډونوالو ته په خطاب کې د سترې محکمې د نظامي محاکمو معاون محترم شیخ خیرجان (خیرخواه) صاحب وویل، په خپلو پرېکړو او اجراآتو کې عدالت کوئ، له مراجعینو سره د اسلامي شریعت مطابق نېک چلند کوئ او د دوی دوسیو ته په ټاکلي وخت رسېدنه وکړئ.
نوموړي زیاته کړه، قضائیه قوه د اسلامي امارت مهم او اساسي رکن دی چې د هیوادوالو د قضایاوو د حل دروند مسؤولیت په غاړه لري، په دې اساس د محاکمو قضائي او اداري غړي مکلف دي چې په پوره امانت دارۍ خپل دروند مسؤولیت په ښه ډول ترسره کړي.
د سیمینار ګډونوالو د سترې محکمې له محترم عالي مقام څخه مننه وکړه چې د دوی لپاره یې ګټور او مهم سیمینار جوړ کړی و وویل، موږ په یاد سیمینار کې له مسلکي علماء کرامو او د سترې محکمې د قضائي زده کړو عمومي ریاست له استادانو د قضاء مسلک اړوند ډېر څه زده کړل چې راتلونکي کې به زموږ د قضائي چارو د ښه ترسره کېدو لامل شي.
د سیمینار د پای غونډه د قضائي زده کړو د عمومي رئیس محترم مولوي عبدالرحمن (غزنوي) لخوا د دعائیې په ویولو پای ته ورسېده.