د سترې محکمې د جزا دېوان عمومي رئیس د یوه پلاوي په مشرۍ غزني ولایت ته سفر وکړ
د روان ۱۴۴۵ هـ ق کال د ربیع الثاني میاشتې په ۱۵مه نېټه د سترې محکمې د مرکزي تمیز اړوند جزا دېوان عمومي رئیس محترم مفتي عتیق الله (دروېش) د یوه پلاوي په مشرۍ چې په ترکیب کې یې د جزا دېوان مفتي صاحبان (محترم مفتي محمد سليم او محترم مفتي سعيد احمد مزمل) شامل وو؛ د یو شمېر جزائي موضوعاتو د حل او فصل په موخه غزني ولایت ته سفر وکړ.
د جزا دېوان عمومي رئیس او ورسره مل پلاوي د یاد سفر په جریان کې د غزني د مرافعه محکمې له رئیس، قضائي غړو او د یاد ولایت د محاکمو له یو شمېر نورو مسؤولینو سره هم وکتل.
محترم مفتي دروېش صاحب د یادې لیدنې پر مهال غزني ولایت د محاکمو قضائي غړو ته د جزائي دوسیو د حل او فصل په تړاو پر ګټورې وینا سربېره د یادو مواردو په برخه کې ځينې لازم هدایات هم وکړل.
دغه راز د سترې محکمې د جزا دېوان عمومي رئیس غزني ته د سفر په جریان کې پنځه مهم جزائي موضوعات حل او نهايي کړل.
د یادونې وړ ده چې د سترې محکمې دغه پلاوی له لاسته راوړنو تر ډک سفر وروسته د ربیع الثاني میاشتې په ۱۷مه نېټه بېرته سترې محکمې ته ستون شو.
