د افغانستان اسلامي امارت د سترې محکمې د قضائي تعلیماتو په ریاست کې (۴۵)ورځنی تربیتي سیمینار پای ته ورسېد
د افغانستان اسلامي امارت د سترې محکمې د قضائي تعلیماتو عمومي ریاست په تالارکې (۴۵) ورځنی قضائي تعلیمي سیمینار چې د روان ۱۴۴۵ هجري قمري کال د محرم الحرام د میاشتې په ۲۵مه نېټه پیل شوی و، نن د ربیع الأول د میاشتې په لسمه نېټه پای ته ورسېد.
په دغه سیمینار کې د بېلا بېلو محاکمو (۲۲) تنه جدید التقرر قضائي غړي شامل وو چې د قضاء برخې د مسلکي استادانو او شیوخ کرامو لخوا ورته د قضائي موضوعاتو اړوند عملي او نظري روزنه ورکړل شوه.
په یاد قضائي سیمینار کې د بېلا بېلو قضائي چارو اړوند علمي او نظري درسونو سربېره په ګډونوالو مختلف النوع قضائي فیصلې، وثایق، قرارونه اونور ولیکل شول.
د یاد سیمینار ګډونوالو د سترې محکمې له عالي مقام څخه مننه وکړه چې دوی ته یې د قضاء برخه کې د مسلکي وړتیا لوړنې په موخه یاد سیمینار جوړ کړی وو او وویل، د دغه سیمینار په سبب به د دوی په قضائي چارو کې لا پرمختګ او چټکتیا رامنځته شي.
د یادونې وړ ده چې په قضائي زده کړو عمومي ریاست کې د هیواد د ۳۴ ولایتونو د نظامي محاکمو د قضاتو، مفتیانو او محررینو لپاره هم ۴۵ ورځنی علمي تربیتي سیمینار دوام لري.
