د جنوب غرب زون د تمیز عالي رياست مفتشينو د هلمند ولايت له محاکمو څخه ليدنه وکړه

د جنوب غرب زون د تمیز عالي رياست او د سترې محکمې د قضائي معاونيت د محترم مقام په هدایت د قضائي پلټنې يو څلور کسيز ټاکل شوي پلاوي چې د شيخ محمد لعل (بند تيموري)، مولوي محمد موسی کليم، مفتي فتح محمد (فاتح) او مولوي عبدالبصیر (سميع) په کې د مسلکي غړيو په توګه دنده لرله، د روان ۱۴۴۶ هـ ق کال د شعبان المعظم میاشتې په ۱۶ مه نېټه د هلمند ولایت د محاکمو د تېرو فعالیتونو د څېړنو په موخه ياد ولايت ته سفر وکړ.
د قضائي تفتيش یاد پلاوي د سفر او ليدنې په پیل کې د هلمند ولايت د مرافعه محکمې له محترم رئیس سره وکتل، په دې ليدنه کې يې د محاکمو د ظرفيت لوړولو او معیاري کولو په اړه خبرې وکړې.
د ليدنې په دوام ياد پلاوي د خپل کاري پلان له مخې د یاد ولایت شمالي ولسوالیو له ابتدائیه محاکمو څخه په جلا جلا ډول لیدنه وکړه.
یاد پلاوي د څارنې بهیر په ترڅ کې د یادو محاکمو د قضائي، اداري او مالي چارو هر اړخیزه پلټنه وکړه، د محاکمو د قضائي او اداري پرسونل د سلوکي او مسلکي اړخونو معلومات يې واخېستل او د چارو د سمون په برخه کې ورته لازمې لارښوونې وکړې.
ياد پلاوي د محاکمو اړوند شته ستونزې، کاري خنډونه او لوژستیکي نېمګړتیاوې له ځان سره وليکلې او د ليدنې په وروستيو کې يې د ستونزو د حل، خنډونو د له منځه وړلو، د شته نېمګړتیاوو د اکمال په اړه د هلمند ولایت د مرافعه محکمې د ریاست له مقام سره تفاهمي ناسته وکړه او ځينې ستونزې يې په جلا جلا توګه ورسره شريکې کړې.
ياد پلاوي د څارنې او ليدنې په دوام د ولسوالیو له مسؤولینو، علماء کرامو او قومي مشرانو سره ناستې وکړې او د محاکمو د فعالیتونو د لا ښه پرمختګ او د ځينو اړونده ستونزو د حل په موخه يې د هغوی نظرونه واورېدل.
یاد پلاوي د محاکمو په وړاندې د شته ستونزو دقيقه او هر اړخيزه پلټنه او څارنه وکړه
د جنوب غرب زون د څارنې او پلټنې پلاوي ياد له لاسته راوړنو ډک سفر د ۱۴۴۶ هـ ق کال د شعبان المعظم مياشتې په ۲۶ مه نېټه پای ته ورسېد.