د ننګرهار ولايت د مرافعه محکمې رئيس د یاد ولايت د درېیو ولسواليو له ابتدائیه محاکمو څخه ليدنه وکړه

د ننګرهار ولايت د مرافعه محکمې رئيس محترم خليفه مولوي محبوب الرحمن (نقشبندي) او ورسره مل هيئت، د ۱۴۴۸هـ ق کال د محرم الحرام میاشتې په ۱۵مه، ۱۶مه او ۱۷مه نېټه د دغه ولايت د مهمندرې، لعلپورې او کامې ولسواليو له ابتدائيه محاکمو څخه لیدنه وکړه.
د یادې لیدنې په ترڅ کې د مرافعه محکمې هيئت د ابتدائيه محاکمو د قضيو د اجراآتو، فيصلو، د دوسيو د اندراج کتابونو، د عرايضو د ثبت دفترونو او نورو اړوندو اسنادو هر اړخېزه ارزونه ترسره کړه او همدارنګه یې د چارو د لا ښه تنظيم، د اسنادو د خوندي ساتنې، د اداري نظم د پياوړتيا او د قضائي اجراآتو د لا ښه والي په موخه اړوندو مسؤولينو ته لازمې سپارښتنې او هدايتونه وکړل.
د مرافعه محکمې پلاوي د مهمندرې، لعلپورې او کامې ولسواليو د امنیه قوماندانيو، استخباراتو او نورو اړوندو ادارو له مسؤولينو سره ګډې غونډې ترسره کړې، په دغو غونډو کې د قضائي فيصلو د اغېزمن تطبيق، نافذه اصولو د حاکميت د ټينګښت، د مراجعينو ستونزو ته پر وخت رسېدنې، د دوسيو د چټک او عادلانه حل او فصل او د عدلي او امنيتي ارګانونو ترمنځ د لا پياوړې همغږۍ او همکارۍ پر ارزښت مفصلې خبرې وشوې.
په پای کې یادو ارګانونو د دوامدارې همکارۍ او همغږۍ د لا پياوړتيا ژمنه وکړه او ټينګار وشو، چې د عدلي او قضائي خدمتونو د ښه والي او د نافذه اصولو د حاکميت د ټينګښت لپاره به ګډې هڅې په دوامداره توګه روانې وي.