د سترې محکمې د قضائي زده کړو ریاست او وثايقو آمريتونو په انګړ کې د يو مسجد د بنسټ ډبره کېښودل شوه

د سترې محکمې د اداري مرستيال محترم شيخ عبدالمالک (حقاني) صاحب لخوا د قضائي زده کړو رياست او وثايقو آمريتونو په انګړ کې نن پنجشنبې د ۲۳/ ۳/ ۱۴۴۶ هـ ق نېټه د يو مسجد جوړېدو د بنسټ ډبره کېښودل شوه.
په دې موخه جوړ شويو مراسمو کې د سترې محکمې پر اداري مرستيال سربېره، د حج او اوقافو وزارت اداري او مالي مرستيال محترم شيخ عارف الله (عارف)، د سترې محکمې مالي او اداري چارو عمومي رئيس محترم الحاج مولوي کريم الله (زاهد)، قضائي غړو، اداري کارکوونکو او يو شمېر مراجعينو ګډون کړی و.
یادو مراسمو کې د سترې محکمې اداري مرستيال محترم شيخ عبدالمالک حقاني وويل، ياد مسجد د سترې محکمې د محترم رئیس او قاضي القضات په وړانديز، د اداري معاونيت او اړوند رئيسانو په غوښتنه او د حج او اوقافو وزارت په منظورۍ جوړېږي.
محترم حقاني صاحب زیاته کړه، دا يو عادي کور او دفتر نه دی، بلکې مسجدونه د اسلام بنسټونه دي او د کومو مسجدونو بنسټ چې د تقوا پر اساس اېښودل شوی وي، هغه الله تعالی ته د نږدې والې ذريعه ګرځي.
دغه راز محترم حقاني صاحب له ديني او شرعي اړخه د مسجدونو پر ارزښت هر اړخيزه وینا وکړه، د حج او اوقافو وزارت له مسؤولينو يې مننه وکړه او د اړوند پروژې مسؤولينو ته يې سپارښتنه وکړه، چې خپلې چارې د دوه اړخيز قرارداد مطابق په پوره صداقت او ایماندارۍ سره ترسره کړي.
محترم حقاني صاحب وويل، د دې مسجد په جوړېدو سره به د لمانځه د ځای په برخه کې د قضائي غړو، اداري کارکوونکو او مراجعينو ستونزې په بشپړ ډول حل شي.
د یادونې وړ ده چې یاد مسجد د شپږو میاشتو په موده کې د شاوخوا اووه ميليونه افغانيو په ارزښت په دوه پوړونو کې جوړېږي؛ چې په يو وخت کې به د اووه سوه لمونځ کوونکو ظرفيت ولري.
یاد مراسم د حج او اوقافو وزارت اداري او مالي مرستيال په اختتاميه دعاء پای ته ورسېدل.