د غزني د مرافعه محکمې رئيس د امارتي ادارو له مسؤولينو سره وکتل

د غزني ولایت د مرافعه محکمې سرپرست رئیس محترم مولوي محمد مبین (الطاف) د کرنې، مالدارۍ او اوبو لګولو له رئیس مولوي ګلاب الدین (ذبیح الله)، د عدلیې رياست له رئیس مولوي مطیع الحق (عثمان)، د قضایای امارت له امر او د غصب د مخنیوي کمېسیون له اداري مدیر مولوي ضیاء الرحمن سره په ۱۷/ ۲/ ۱۴۴۶ هـ ق نېټه وکتل.
غونډه د قرآنکریم د څو مبارکو آیاتونو په تلاوت پیل شوه؛ ورپسې د مرافعه محکمې سرپرست رئیس وویل، خدای (جل جلاله) پر موږ او تاسو عظیم احسان وکړ او یوه ستره فتحه او آزادي مو په نصیب شوه، دا احسان شکرانه غواړي او دا شکرانه به موږ او تاسو د ستړي او ځورېدلي ملت په خدمت باندې ادا کوو.
نوموړي زیاته کړه، دا ۲۰ کاله ملت په ډېر اخلاص زموږ خدمت وکړ، اوس باید موږ د دوی ستونزو ته پر وخت رسېدنه وکړو.
د غونډې په دوام په یو شمېر ګډو موضوعاتو باندې بحث وشو او حللارې یې په ګوته شوې.
 د زراعت او عدلیې ریاست رئیسانو د ورته غونډو د دوام غوښتنه وکړه او غونډه د مرافعه محکمې د سرپرست رئیس په دعا پای ته ورسېده.