د کابل ولايت ښاري ابتدائیه محکمې دویم زون او امنیتي حوزو ترمنځ د همغږۍ غونډه وشوه
د کابل ولايت ښاري ابتدائیه محکمې د دویم زون عمومي رئیس محترم مفتي محمد عرفان (الهام) په مشرۍ؛ د یاد زون اړوند د جزا او امنیت عامه دېوانونو رئیسانو، د دویم زون اړوند امنیتي حوزو آمرینو او د جنائي پیښو پر وړاندې د مبارزې مدیرانو په ګډون په ۹/۹/ ۱۴۴۶ هـ ق د چارو د ښه انسجام او اداري آسانتیاوو په موخه مشورتي او تفاهمې غونډه ترسره شوه.
غونډه د دويمې امنیتي حوزې د آمر محترم عبدالله (غزنوي) په تلاوت پیل شوه؛ ورپسې د یاد زون عمومي رئیس ګډونوالو ته د ښه راغلاست ترڅنګ د بحث او اجنډا موضوعات روښانه کړل وویل، په دې غونډه کې باید د امیرالمؤمنین (حفظه الله) هغه فرامینو په اړه خبرې وکړو کوم چې د محاکمو او جنائي پېښو د متهمینو او بندیانو په اړه دي او په ګډه هڅه وکړو چې یاد فرامین په ښه توګه عملي شي.
د غونډې په دوام د یادو فرمانونو په اړه له بحث وروسته د حوزو آمرینو د جزائي دوسیو په اړه خپل نظرونه وړاندې کړل او د جزا او امنیت عامه دېوانونو رئیسانو لخوا یاد نظرونه یاداشت شول.
ورپسې د یاد زون محترم رئیس د امنیتي حوزو لخوا د وړاندې شويو نظرونو او اړوند مسايلو ته د غوره رسېدنې حل لارې بیان کړې.
دغه راز په دې غونډه کې پرېکړه وشوه چې د دواړو ادارو ترمنځ به په دوامداره توګه ښه همغږي موجوده وي؛ تر څو د خلکو ستونزو ته په عاجله او ښه توګه رسېدنه وشي.
غونډه د دعا په ویلو پای ته ورسېده.
