د پکتیا ولایت د مرافعه محکمې رئیس د ماتحت محاکمو له مسؤولینو او منسوبینو سره د عالیقدر امیرالمؤمنین (حفظهالله تعالی) سپارښتنې شریکې کړې
د پکتيا ولايت مرافعه محکمې عمومي رئيس محترم مفتي عبيدالله (خالد) په مشرۍ؛ د مرافعه او ښاري ابتدائيه محاکمو د قضائي غړو او اداري کارکوونکو په ګډون په ۱۵/ ۱۰/ ۱۴۴۶ هـ ق نېټه اداري غونډه وشوه.
د غونډې په پيل کې د مرافعه محکمې رئيس د اسلامي امارت له زعیم عالیقدر امیرالمؤمنین (حفظهالله) سره د لیدنې په اړه خبرې وکړې وویل، عالیقدر امیرالمؤمنین (حفظهالله تعالی) د لوی خدای (جلجلاله) ولي او دوست دی، کوم صفتونه چې د الله (جلجلاله) په یو ولي او دوست کې وي، په اميرالمؤمنين شيخ صاحب کې یې ټول اوصاف موجود دي، هغه يو معتقد، متقي، پرهېزګار، د ښو اخلاقو او اوصافو لرونکی شخصيت دی.
د مرافعه محکمې رئيس زیاته کړه، عالیقدر امیرالمؤمنین (حفظهاللهتعالی) د اسلام دین پر ټولو شرعي فضایلو او مسایلو پوه او آګاه دی، هر فرمان او حکم يې د شریعت مطهره سره برابر او د اسلامي اصولو په رڼا کې صادرېږي.
نوموړي د اسلامي امارت د زعيم د حکمونو او فرمانونو پر اطاعت ټینګار وکړ او د هغه توصيې يې قضاتو ته وړاندې کړې وویل، په خپلو فیصلو کې له پوره دقت او غور څخه کار واخلئ، خپلې قضائي چارې په پوره اخلاص او صداقت سره ترسره کړئ، قضائي چارو کې جد و جهد وکړئ، تل مطالعه وکړئ، په ورځنیو چارو کې مطالعې ته وخت ورکړئ، د فیصلې له کولو څخه وروسته دې هر قاضي خپله کړې فیصله پخپله وګوري او خپل نواقض دې ځان ته په ګوته او اصلاح کړي او هره فیصله چې د هر قاضي لخوا کېږي، له ډېرې پلټنې، تحقیق او د اسلامي شریعت د اصولو په رڼا کې دې وشي، ترڅو په راتلونکي کې ستونزه پيدا نشي او د خلکو وخت ونه نیول شي.
د غونډې په وروستيو کې د مرافعه محکمې رئيس زیاته کړه، عالیقدر امیرالمؤمنین (حفظهاللهتعالی) وايي، تاسو د اسلامي امارت ټول مسؤولین او کارکوونکي متحد، با اتفاقه او له هر ډول تبعیض او تعصب څخه لرې اوسئ، خپل ولس په غېږ کې ونیسئ او د خپلو ولسونو سره په مینه ژوند وکړئ.
یاده غونډه د ابتدائیه محکمې محترم رئيس مولوي محمد رحیم (نعماني) له خبرو وروسته د دعاء په لوستلو پای ته ورسېده.
