په ننګرهار ولايت کې دوو متهمينو ته تعزیري سزا ورکړل شوه

د ننګرهار ولايت سپين‌زر ولسوالۍ ابتدائیه محکمې د پرېکړې له مخې دوو کسانو ته چې په (قطاع الطريقۍ) متهم وو؛ نن يکشنبه (۲/ ۶/ ۱۴۴۷ هـ ق) نېټه تعزیري سزا ورکړل شوه.
ابتدائیه محکمې یاد کسان پر دوه ـ دوه کاله او شپږوـ شپږو میاشتو تنفيذي بند او ۳۹ـ ۳۹ دُرو تعزیري سزا محکوم کړي وو؛ چې یاده پرېکړه د سترې محکمې عالي مقام له تائيد وروسته پر متهمينو تطبيق شوه.
په دې موخه جوړه شوې غونډه کې د یادې ابتدائیه محکمې رئيس، قضائي غړو او اداري کارکوونکو، ولسوال، امنیه قوماندان، د استخباراتو مدیر، د امر بالمعروف، نهی عن المنکر او شکایتونو د اورېدو کارکوونکو او عام ولس ګډون درلود.
 غونډه د قرآنکریم د څو مبارکو آیاتونو په تلاوت پیل شوه؛ ورپسې د یادې ابتدائیه محکمې رئیس مولوي سید محمود (الهاشمي) وینا وکړه وویل، الحمدلله په افغانستان کې اسلامي او شرعي نظام قائم دی او د ټولو افغانانو هیلې همدې نظام پورې تړلې دي، هر هغه څوک چې د شریعت خلاف کړنې ترسره کوي، هغوی ته به د شریعت مطابق سزا ورکول کېږي او د نظام بقاء د اسلامي احکامو په تطبیق کې ده.