د پکتیکا ولایت د نظامي محکمې رئیس د یاد ولایت درېیو ولسوالیو ته سفر وکړ

د پکتيکا ولايت د نظامي محکمې رئيس محترم مولوي عبدالمنان (محق) د يوه پلاوي په مشرۍ په ۵ /۴ /۱۴۴۶ هـ ق نېټه د ياد ولايت  وازېخواه، خوشامند او جانخیل ولسواليو ته سفر وکړ او د یادو ولسوالیو له نظامي او ملکي مسؤولينو سره يې وکتل.

د پکتیکا د نظامي محکمې رئیس د دغه سفر پر مهال د یادو ولسوالیو د محاکمو له مسؤولینو، ولسوالانو، امنیه قوماندانانو، د استخباراتو له مدیرانو او نورو اړوند امارتي ادارو له استازو سره وکتل.

محترم مولوي عبدالمنان (محق) د دغه ولسوالیو له مسؤولینو څخه د نظام ساتنې د سترې وجیبې او په سیمه کې د ښه امنیت د ټینګښت په پار مننه وکړه او د نظامي محکمې اړوند موضوعات او مسؤولیتونه، د عالیقدر امیرالمؤمنین (حفظه‌الله) فرمانونه او د سترې محکمې اړین متحدالمآلونه یې ورته تشرېح کړل.

په دې سربېره یې مجاهدینو ته په اسلامي نظام کې د محاکمو د ارزښت په اړه خبرې وکړې او زياته يې کړه چې د اسلامي امارت د غازیانو ټولې قربانۍ د همدغه هدف لپاره وې چې په ګران هېواد افغانستان  کې سوچه اسلامي نظام نافذ شي.

نوموړي وويل چې د اسلامي شريعت تنفیذ د محاکمو دنده ده؛ نو په کار ده چې د اسلامي امارت ټول منسوبين له محاکمو سره پوره پوره همکاري وکړي.

په پای کې د یادو ولسوالیو اړوند مسؤولینو له محاکمو سره د اجراآتو او فیصلو د تنفیذ او تطبیق په برخه کې د هر ډول لازمې او اصولي همکارۍ ژمنه وکړه.

ناستې د دعاء په ویلو پای ته ورسېدې.