د قضائیه قوې د محاکمو امنیتي او اجرائیوي چارو عمومي ریاست یوه پلاوي د ختیځ زون د محاکمو د امنیتي قطعاتو له چارو څارنه وکړه
د روان ۱۴۴۵ هـ ق کال د جمادی الأولی میاشتې له پنځمې نېټې څخه تر ۱۳مې نېټې پورې د قضائیه قوې د محاکمو د امنیتي او اجرائیوي چارو عمومي ریاست اړوند د تفتیش او کنټرول مدیریت څلور کسیز پلاوي د تفتیش عمومي مدیر مفتي عبدالرؤف (یوسف) په مشرۍ د ملکي او نظامي محاکمو د امنیتي قطعاتو له چارو لیدنه او څارنه وکړه.
د یاد ریاست د تفتیش او کنټرول مدیریت پلاوي په دې لیدنه کې د کونړ، لغمان، ننګرهار، نورستان، پنجشیر، کاپیسا او پروان د ملکي او نظامي محاکمو د امنیتي قطعاتو د مجاهدینو د تعیناتو، اداري او امنیتې چارو، د تأمیناتي چارو، اکمال او توزېع، د پرسونل له حاضرۍ، مالي چارو، د مراجعینو او وسایطو د تلاشۍ له بهیر او نورو اړوند مواردو څخه کنټرول او څارنه وکړه.
دغه راز یاد پلاوي مجاهدینو ته د سیرت او صورت د اصلاح، پر نبوي سنتو د ځان برابرولو، په جماعت سره د لمانځه ادا کولو او خپلو دندو ته د پاملرنې برخه کې د لازمو لارښوونو او سپارښتنو ترڅنګ مجاهدین د امنیتي چارو لا ښه سمبال، له مراجعینو سره نېک چلند او نبوي اخلاقو لرلو ته وهڅول.
د یادونې وړ ده چې د قضائیه قوې د امنیتي او اجرائیوي چارو عمومي ریاست دغه پلاوي د محاکمو له رئیسانو سره هم د اړوند مواردو په تړاو د مشورو لپاره ناستې ترسره کړې.
