د قضائي تعلیماتو په ریاست کې د پکتيا او باميانو ولایتونو ۱۰۶ تنو قضاتو ته علمي او تربيتي سيمينار ورکړل شو.
نن دوشنبه ۱/۱۲/۱۴۴۴ ھ.ق نېټه د افغانستان اسلامي امارت د سترې محکمې د قضائي تعلیماتو ریاست له لوري د روان ۱۴۴۴ ھ.ق کال د ذوالقعدې په ۲۱ نېټه د شنبې په ورځ د قضائي تعلیماتو ریاست په تالار کې د پکتیا او بامیان ولایتونو د مرافعه محکمې، ښاري محکمې او د ولسوالیو د ابتدائیه محاکمو د قضاتو، مفتیانو او محررینو لپاره علمي او تربیتي سیمینار پیل شو.
په دغه سیمینار کې د مسلکي استادانو له لوري نوموړو ته په قضائي او اداري برخه کې پراخ معلومات ورکړل شول.
ياد سیمینار چې پوره لس ورځې یې دوام وکړ، په ترڅ کې یې اداري اصولنامه، حقوقي اصولنامه، معین القضاة والمفتیین او د رهنمايي وثائق مهمې برخې درساً وویل شوې، او همداراز د اسنادو او وثیقو، عریضو اوجلب پاڼو، صورت دعوی ، دفع دعوی او فیصلو لیکلو شرائط، د اشتباه موارد اوګڼ نور اړین قضائي او اداري معلومات ورسره شریک شول.
په دې سربېره په نوموړو د قضاء په برخه کې عملي کار هم ترسره شو چې د مختلفو موضوعاتو او مثبته اسبابو په نظر کې نیولو سره یو شمېر مکملې فیصلې پرې مطالعه او ولیکل شوې.
یاد سیمینار نن د ذوالحجې د میاشتې په لومړۍ نېټه د یو لړ مهمو توصیو سره پای ته ورسېد.
