د لغمان د مرافعه محکمې رئیس د دغه ولایت د ښاري ابتدائیه او علیشنګ ولسوالۍ له محاکمو لیدنه وکړه
د ۱۴۴۴ هـ ق کال د شوال المکرم میاشتې په ۱۰مه نېټه د لغمان ولایت د مرافعه محکمې عمومي رئیس ښاغلي مفتي عبدالله (فرقاني) د یاد ولایت له ښاري محکمې څخه لیدنه وکړه.
د مرافعه محکمې رئیس د یادې محکمې له قضاتو او اداري کارکوونکو سره ګډه ناسته وکړه، په دې ناسته کې یې ټول منسوبین خپلو دندو او مسؤولیتونو ته متوجه کړل او وویل، زموږ اوستاسو هدف صرف او صرف د الله تعالی رضا او په ټولنه کې د عدالت تأمینول دي او په دې برخه کې باید ډېر کوښښ وشي ترڅو حق حقدار ته وسپارل شي، له ظالم څخه د مظلوم پوښتنه وشي او د ظلم له امله په خپله سزا ورسېږي.
وروسته د مرافعه محکمې رئیس د لغمان ولایت د ښاري ابتدائیه محکمې د رئیس محترم مولوي امیرحمزه په ملتیا علیشنګ ولسوالۍ ته سفر وکړ ترڅو د یادې ولسوالۍ د ابتدائیه محکمې چارې له نږدې وګوري.
د مرافعه محکمې رئیس د علیشنګ ولسوالۍ ابتدائیه محکمې حاضري او نورې چارې له نږدې څخه ولیدلې او د دې محکمې منسوبینو ته په خطاب کې یې وویل، خپلو دندو ته په پابندۍ سره دوام ورکړئ او خپلې کړنې په شفافه توګه د اسلامي شریعت په رڼاکې ترسره کړې، له مراجعینو سره نېکه او احسنه رویه اختیار کړئ.
