په پکتیکا ولایت کې د قومونو ترمنځ (۸۰) کلنه د شخړې او یوه د قتل موضوع حل شوه
د پکتيکا ولايت دنکه او مټاخان ولسواليو ابتدائیه محاکمو مسؤولينو په هڅو؛ د قومي مشرانو او سپين ږیرو په منځګړیتوب، د ۱۴۴۷هـ ق د شعبان المعظم میاشتې په ۲مه او ۳مه نېټه د څلورو قومونو ترمنځ اتیا کلنه شخړه او بله د قتل موضوع د سولې له لارې حل او فصل شوه.
د شخړې موضوع (۸۰) کاله مخکې د څلورو قومونو (اندرخېلو، مردک خېل، کڼي خېلو او شمرود) ترمنځ د ځمکې په سر د جنجال له امله رامنځته شوې وه او بله موضوع د دوو کورنيو ترمنځ پېښه شوې وه، چې يو کس په کې وژل شوی و.
یاد موضوعات ابتدائیه محاکمو ته تر راجع کېدو وروسته په غور او دقت وڅېړل شول، ورپسې مسؤولينو او قومي مشرانو یاد طرفونه سولې ته وهڅول، له ډېرو هڅو او ترغيب وروسته يې سولې ته غاړه کېښوده.
د شخړې او قتل یاد موضوعات د جانبینو تر رضایت وروسته د يوې غونډې په ترڅ کې چې د سيمې علماء کرامو، قومي مشرانو او سپینږیرو هم په کې ګډون درلود؛ یو بل ته تر بخښنې وروسته په رسمي ډول پای ته ورسېدل.
