د قضائي تفتیش عمومي ریاست مفتشینو د بلخ ولایت له محاکمو او مرکزي زندان څخه لیدنه وکړه
د سترې محکمې د محترم مقام په هدایت د قضائي پلټنې عمومي ریاست یوه مؤظف پلاوي چې د یاد ریاست مرستيال محترم مولوي عبدالولي (محمود) يې مشري کوله؛ مولوي فلک شېر (حقاني) او مولوي امدادالله (حنفي) يې غړيتوب درلود، د روان 1447 هـ ق کال د جمادی الآخرة میاشتې په ۱۳مه نېټه بلخ ولایت ته د محاکمو د تېرو فعالیتونو د څېړلو په موخه سفر وکړ.
د لیدنې په پيل کې یاد پلاوي د مرافعه محکمې له رئیس سره وکتل، ورپسې یې د بندیانو د ستونزو د څېړلو په موخه د یاد ولایت له مرکزي زندان څخه لیدنه وکړه، له بندیانو سره یې وکتل، کومو بندیانو چې شکایتونه درلودل، شکایتونه يې له ځان سره ولیکل او بیا يې د اړوند محاکمو له مسؤولینو سره شریک کړل.
دغه پلاوي د خپل کاري پلان له مخې د یاد ولایت د (۱۶) ولسوالیو د ابتدائیه محاکمو، د حقوقو مدیريتونو، د ښاري ابتدائیه او مرافعه محاکمو اړوند دېوانونو، وثایقو، مخزن او حقوقو آمریتونو، اختصاصي او نظامي محاکمو څخه جلا جلا لیدنه وکړه.
دغه پلاوي د پلټنې بهیر په ترڅ کې د یادو محاکمو د قضائي، اداري او مالي چارو هر اړخیزه پلټنه ترسره کړه، د محاکمو د قضائي او اداري پرسونل د سلوکي او مسلکي اړخونو معلومات یې واخیستل او د چارو د سمون په برخه کې یې ورته لازمې لارښوونې وکړې.
د ليدنې په دوام یاد پلاوي د محاکمو اړوند شته ستونزې، کاري خنډونه او نېمګړتیاوې له ځان سره یادداشت کړې او په پای کې یې د ستونزو د حل، د خنډونو له منځه وړلو او د نېمګړتیاوو د اکمال په اړه د بلخ ولایت د مرافعه محکمې له مقام او قضائي مسؤولینو سره تفاهمي ناسته وکړه او ټولې ستونزې يې په جلا جلا توګه ورسره شریکې کړې.
یاد پلاوي د خپل سفر په جریان کې د بلخ ولایت د ولسوالیو له مسؤولینو سره ناستې وکړې او د محاکمو د فعالیتونود لا ښه پرمختګ او د ځینو اړونده ستونزو د حل په موخه د هغوی نظرونه واورېدل.
د قضائي پلټنې پلاوي یاد سفر د 1447 هـ ق کال د رجب میاشتې په 9 مه نېټه پای ته ورسېد.
