په بلخ ولايت کې دوو مجرمينو ته تعزیري سزا ورکړل شوه
د بلخ ولايت نهرشاهي ولسوالۍ ابتدائيه محکمې د پرېکړې له مخې نن پنجشنبه (۲۰/ ۹/ ۱۴۴۶هـ ق نېټه) دوو کسانو ته د بهرنيو الکولي مشروباتو د قاچاق په جرم؛ د یادې محکمې په انګړ کې تعزیري سزا ورکړل شوه.
ابتدائيه محکمې ياد کسان پر يوـ یو کال او څلورـ څلور میاشتې تنفيذي بند او ۳۹ـ ۳۹ دُرو تعزیري سزا محکوم کړي وو؛ چې یاده پرېکړه د سترې محکمې د عالي مقام له تائید وروسته تطبيق شوه.
په دې موخه جوړه شوې غونډه کې د مرافعه محکمې رئيس الحاج شيخ محمدګلاب الدين (فاروقي)، د ښاري ابتدائيه محکمې رئيس الحاج مفتي محمد ولي (حقاني)، د یادې محکمې رئيس مولوي آدم خان (ابوالجميل)، د علماوو شورا رئيس مولوي عبدالجليل (شهيدخېل)، د امر بالمعروف، نهی عن المنکر او شکايتونو اورېدو رئيس، قضائي غړو او عامو هېوادوالو ګډون درلود.
غونډه د قرآنکریم د څو مبارکو آيتونو په تلاوت پيل شوه؛ ورپسې د ښاري ابتدائیه محکمې رئيس په اسلامي نظام کې د محاکمو ارزښت، حيثيت او مسؤوليت او په ټولنه کې د حدودو او تعزیراتو د تطبيق د ګټو په اړه وینا وکړه.
د ښاري محکمې رئيس د غونډې ګډونوالو ته ډاډ ورکړ، چې محاکم د حقوق الله او حقوق العبد د خونديتوب او حقدار ته د حق ورکولو په موخه په پوره استقلالیت سره د شريعت محمدي (صلیالله عليه وسلم) په رڼا کې خپل قضائي اجراآت سرته رسوي.
غونډه د تعزیري سزا له تطبيق وروسته د مرافعې محکمې د جزا دېوان رئيس شيخ فريد الدين (حقاني) په دعاء پای ته ورسېده.
