د سترې محکمې رئیس او قاضي القضاة پکتیا ولایت ته سفر وکړ
نن چهارشنبه (د روان ۱۴۴۵ هـ ق کال د محرم میاشتې ۱۶مه نېټه) د افغانستان اسلامي امارت د سترې محکمې رئيس او قاضي القضاة محترم شیخ عبدالحکیم «حقاني» صاحب پکتیا ولایت ته د سفر پر مهال د دغه ولایت د مرافعه محکمې له قضائي او اداري منسوبینو سره د یادې محکمې د غونډو په تالار کې وکتل.
د غونډې په پیل کې د پکتیا د مرافعه محکمې رئيس محترم مفتي امان الله «حقاني» د سترې محکمې محترم رئیس او قاضي القضاة صاحب او ورسره مل پلاوي ته ښه راغلاست ووایه او پکتیا ولایت ته د دوی له سفر یې مننه وکړه.
قاضي القضاة محترم شیخ «حقاني» صاحب د پکتیا ولایت د مرافعه او ښاري ابتدائيه محاکمو قضائي او اداري کارکوونکو ته د محاکمو پر قضائي او اداري چارو رڼا واچوله، د محاکمو او نورو اړوند ادارو تر منځ پر همغږۍ، په محاکمو او دواوینو کې د چارو پر شفافیت او قضائي چارو ته د جدي پاملرنې په اړه تفصیلي او ګټورې خبرې وکړې.
شیخ صاحب د ناستې ګډونوالو ته ټینګار وکړ چې تل د اصولو پابند اوسئ، که اصول مراعت کړئ، هیڅکله به له ستونزو سره مخ نشئ او د مشکل د رامنځته کېدو په صورت کې اصولو ته په کتو سره مشکل حل کړئ.
د سترې محکمې د رئیس او قاضي القضاة محترم شیخ عبدالحکیم (حقاني) صاحب تر تفصیلي وینا وروسته د پکتیا د مرافعه محکمې رئيس محترم مفتي امان الله «منقاد حقاني» د پکتیا د محاکمو ستونزې له ښاغلي قاضي القضاة صاحب سره شریکې کړې.
د ناستې په دوام د سترې محکمې د تدقیق او مطالعاتو عمومي رئيس محترم مفتي حزب الله «ابراهیمي»، د پکتیا زون د نظامي ابتدائيه محکمې رئيس محترم مولوي عبدالهادي «همت» او د پکتیا ولایت د ښاري ابتدائيه محکمې رئیس محترم مولوي محمدرحیم «نعماني» خبرې وکړې او خپل نظرونه یې د ناستې له ګډونوالو سره شریک کړل.
یاده ناسته د دعا په ویلو پای ته ورسېده.
