د سترې محکمې د جزا دېوان عمومي رئیس پروان ولایت ته د سفر پر مهال د قتل اړوند (۱۴) دوسیې حل او فصل کړې
د سترې محکمې د جزا دېوان عمومي رئیس محترم مفتي عتیق الله (دروېش) چې د یاد دېوان مفتي صاحبانو (مفتي عبدالحی شاکر او مفتي فضل الرحمن قاسمي) یې ملتیا کوله د روان ۱۴۴۶هـ ق کال د ربیع الثاني میاشتې په ۲۵مه نېټه د یو شمېر جزائي دوسیو د حل او فصل په موخه پروان ولایت ته سفر وکړ.
د جزا دېوان عمومي رئیس او ورسره مل پلاوي د دغه دوه ورځني سفر پر مهال د پروان مرافعه محکمې له رئیس او اړوند نورو محاکمو له قضائي غړو سره وکتل؛ په دې لیدنه کې د قتل اړوند (۱۴) دوسیو د حل او فصل په اړه لازمې تفصیلي خبرې وشوې.
دغه راز محترم مفتي عتیق الله (دروېش) او ورسره مل پلاوي د یادو دوسیو اړوند ټولو زندانیانو سره په جلا جلا ډول وکتل او له دوی یې د اړوند مواردو په اړه بشپړ تحقیقات وکړل.
د سترې محکمې د جزا دېوان عمومي رئیس د دغه سفر پر مهال د پروان ولایت د محاکمو قضائي مسؤولینو ته هدایت وکړ چې د مراجعینو دوسیې د شرعي احکامو په رڼا کې په ټاکلي وخت حل او فصل کړي.
د جزا دېوان عمومي رئیس د دغه سفر په پایله کې د قتل اړوند (۱۴) دوسیې تر بشپړو څېړونو وروسته د شرعي احکامو په رڼا کې حل او فصل شوې.
