د پکتيا ولايت مرافعه محکمې رئيس په مشرۍ غونډه وشوه

د پکتيا ولايت مرافعه محکمې رئيس الحاج مفتي عبيدالله (خالد) په مشرۍ؛ د مرافعه او ښاري ابتدائیه محاکمو د جزا او عامه امنيت دېوانونو رئيسانو، د امنيه قوماندانۍ مرستيال، د استخباراتو ریاست مرستیال، د زندانونو چارو د سمون رئيس او د نشه‌يي توکو پر وړاندې د مبارزې مدير،  په ګډون په ۱۳/ ۱۱/ ۱۴۴۷ هـ ق نېټه د یو شمېر موضوعاتو په اړه غونډه وشوه.
غونډه د قرآنکریم د څو مبارکو آیاتونو په تلاوت پيل شوه؛ ورپسې د مرافعه محکمې عمومي رئیس د غوڼدې ګډونوالو ته ښه راغلاست ووایه زیاته یې کړه، د امنيه قوماندانۍ او د استخباراتو مسؤولین بايد له محبوسينو سره ښه چلند وکړي، له متهمینو سره باید د تحقیقاتو پر مهال اصولي چلند وکړي، که کوم شخص مجرم ثابت شي، باید ژر تر ژره دوسیه ورته جوړه او محکمې ته وسپارل شي، که کوم شخص مجرم ثابت نشي، بايد د محکمې له لارې آزاد شي.
د غونډې په دوام ګډونوالو ډاډ ورکړ، چې موږ به د بنديانو په موضوع کې خپله ټوله هڅه کوو او له بلې موضوع به دې ته لومړیتوب ورکوو، ترڅو بندیان بې موجبه متضرر نشي او ټول موضوعات په شفاف ډول ترسره شي.
غونډه د ښاري ابتدائیه محکمې عامه امنیت دېوان د رئیس په دعاء ویلو پای ته ورسېده.