د پکتیکا ولایت د وازې‌خوا ولسوالۍ ابتدائیه محکمې د مسؤولينو په هڅو (۵۶) کلنه د قتل موضوع حل او فصل شوه

د پکتیکا ولایت د وازې‌خوا ولسوالۍ ابتدائیه محکمې د مسؤولینو په ډېرو هڅو؛ د علماء کرامو او قومي مشرانو په منځګړیتوب په ۳۰ /۶ /۱۴۴۷ هـ ق نېټه، د دوو کورنیو ترمنځ (۵۶) کلنه د قتل موضوع د سولې له لارې حل او فصل شوه.
په دې پېښه کې چې (۵۶) کاله وړاندې د زابل ولایت اړوند شاه جوی ولسوالۍ کې د دوو کورنیو ترمنځ رامنځته شوې وه؛ د قاتل کورنۍ د زابل ولایت شاه جوی ولسوالۍ اوسېدونکی او د مقتول کورنۍ د وازې خوا ولسوالۍ اوسېدونکې وه، دوه تنه ماشومان وژل شوي وو.
د ابتدائيه محکمې د مسؤولینو په هڅو او د سيمې د علماء کرامو او قومي مشرانو په منځګړیتوب د مقتول کورنۍ د قاتل له کورنۍ سره سولې ته وهڅول شوه، له ډېرو هڅو او ترغیب وروسته جانبینو سولې ته غاړه کېښوده.
دغه د قتل موضوع د جانبینو تر رضایت وروسته د يوې غونډې په ترڅ کې د مقتول لخوا د قاتل کورنۍ ته په بخښنې سره په رسمي ډول پای ته ورسېده.