د لغمان ولايت ښاري ابتدائیه محکمې رئيس د بندیانو او مراجعينو دوسیو ته په ټاکلي وخت پر رسېدنه ټينګار وکړ
د لغمان ولايت ښاري ابتدائیه محکمې رئيس محترم مولوي سلطان محمد (رباني) په مشرۍ؛ د يادې محکمې د دېوانونو رئيسانو، قضائي غړو او د تحريراتو عمومي مدیر په ګډون په ۲۶/ ۱۲/ ۱۴۴۶هـ ق نېټه غونډه کې د بندیانو او مراجعينو دوسیو ته په ټاکلي وخت پر رسېدنه ټينګار وشو.
غونډه د قرانکريم د څو مبارکو آياتونو په تلاوت پيل شوه؛ ورپسې د ښاري ابتدائیه محکمې رئيس د اجنډا سره سم پر يو شمېر موضوعاتو بحث او خبرې وکړې.
یاده غونډه وروسته له هغې جوړه شوه، چې له ناستې يوه ورځ مخکې د ښاري ابتدائیه محکمې رئیس، د جزا او د امنيت عامه دېوانونو رئیسانو په ملتیا د یاد ولايت له عمومي زندان او بنديانو څخه لیدنه وکړه.
د ښاري ابتدائیه محکمې رئیس او ورسره مل پلاوي له زندان څخه د ليدنې پر مهال د بنديانو وضعیت له نږدې وکاته، د زندانیانو اړتیاوې یې له مسؤولینو سره شريکې کړې، دغه راز د زندانیانو هغه موارد چې د دېوانونو اړوند وو، د هغه په اړه یې په اداري ناسته کې خبرې وکړې.
د ښاري ابتدائیه محکمې رئيس د غونډې له ګډونوالو جدي غوښتنه وکړه چې د عاليقدر امیرالمؤمنین (حفظه الله تعالی) د حکم او سترې محکمې عالي مقام د هدایت مطابق د بنديانو دوسیو ته په ټاکلي وخت رسېدنه وکړي.
غونډه د دعا په ويلو پای ته ورسېده.
