د سترې محکمې د جزا دېوان عمومي رئیس د جزائي دوسیو د وروستیو تحقیقاتو بشپړولو په موخه بلخ ولایت ته سفر وکړ
د سترې محکمې د جزا دېوان عمومي رئیس محترم مفتي عتیق الله (دروېش) چې محترم مفتي عبدالحی (شاکر) او محترم مفتي فضل الرحمن (قاسمي) یې ملتیا کوله، د سترې محکمې د رئیس او قاضي القضات محترم شیخ عبدالحکیم (حقاني) صاحب په ځانګړي هدایت د روان ۱۴۴۶ هـ ق کال د جمادی الأولی میاشتې په ۲۹مه او ۳۰مه نېټه د یو شمېر مهمو جزائي دوسیو د وروستیو تحقیقاتو د بشپړولو په موخه بلخ ولایت ته سفر وکړ.
د جزاء دېوان عمومي رئیس بلخ ولایت ته د دغه دوه ورځني سفر پر مهال یاد ولایت کې د ۱۲ جزائي دوسیو په اړه وروستي او لازم تحقیقات بشپړ کړل.
محترم مفتي عتیق الله (دروېش) په یاد سفر کې د بلخ ولایت د مرافعه او نورو اړوند محاکمو له قضائي غړو سره وکتل؛ د جزائي موضوعاتو د حل او فصل په موخه یې ورسره تفصیلي خبرې وکړې.
د سترې محکمې د جزا دېوان عمومي رئیس د بلخ ولایت د محاکمو قضائي غړو ته د جزائي دوسیو د حل او فصل په موخه لازم هدایات وکړل وویل، قضائیه قوه په اسلامي نظام کې مهم ارګان دی چې د عدالت تأمین، د مظلوم غږ اورېدل، مجرمینو ته د شرعي اصولو مطابق سزا ورکول او حق حقدار ته سپارل يې عمده مسؤولیتونه دي.
محترم مفتي دروېش صاحب زیاته کړه، د محاکمو مسؤولین باید د شریعت مطابق فیصلې وکړي او د هېچا تر مستقیم یا غیر مستقیم فشار لاندې رانشي.
د سترې محکمې د جزا دېوان عمومي رئیس د یاد سفر پر مهال د جزائي دوسیو له جانبینو سره وکتل او له هغوی یې د دوسیو په اړه بشپړ تحقیقات وکړل.
