د ننګرهار د مرافعه محکمې سرپرست رئيس د ياد ولايت د (۱۶) ولسواليو له ابتدائيه محاکمو او توقيف خونو ليدنه وکړه

د ننګرهار د مرافعه محکمې سرپرست رئیس محترم مفتي ذبېح الله (ساجد) او ورسره مل پلاوي د روان کال د ربیع الثاني میاشتې له ۲۰مې نېټې څخه د جمادی الأولی میاشتې تر ۴مې نېټې د دغه ولایت د بهسودو، کوټ، لعل پورې، مهمندرې، نازیانو، غني خېلو ، ده بالا، دور بابا، رودات، سپين غر، اچین، دره نور، کوز کونړ، کامې، ګوشتې او بټي کوټ ولسواليو له ابتدائيه محاکمو او توقیف خونو څخه لیدنه وکړه.
په دې ليدنو کې د مرافعه محکمې سرپرست رئیس او ورسره مل پلاوي د يادو ولسواليو د ابتدائيه محاکمو اداري او قضائي چارې له نږدې وکتلې، ذکر شویو محاکمو ته یې د اجراآتو په وخت ترسره کولو، له مراجعینو سره د ښه سلوک او چلند په اړه لازمې سپارښتنې وکړې، د محاکمو قضائي او اداري پرسونل يې خپل منځ کې سره لا ښې همغږۍ ته وهڅول او مسؤولينو ته يې د چارو د چټکتيا او ښه والي په موخه لازمې لارښوونې وکړې.
د ليدنې په دوام ياد پلاوي له توقیف خونو او بندیانو سره وکتل، د بندیانو د ستونزو د حل په موخه يې اړوندو مسؤولینو ته لازمې سپارښتنی وکړې او همداراز يې په شعبو کې د مراجعینو شکایتونه واورېدل او اړونده شعباتو ته يې د حل په موخه لازمې سپارښتنې وکړې.