د افغانستان اسلامي امارت د سترې محکمې رئیس او قاضي القضات هرات ولایت ته سفر وکړ
د سه شنبې په ورځ (د روان ۱۴۴۵ هـ ق کال د محرم الحرام میاشتې په ۹مه) د افغانستان اسلامي امارت د سترې محکمې رئیس او قاضي القضات محترم شیخ عبدالحکیم (حقاني) صاحب هرات ولایت ته د سفر پر مهال د یاد ولایت د مرافعه محکمې له ریاست څخه لیدنه وکړه.
محترم قاضي القضات صاحب د هرات مرافعه محکمې ته له رسېدو وروسته لومړۍ د دې محکمې د غونډو په تالار کې د هرات ولایت اړوند محاکمو له مسؤولینو سره ناسته وکړه، ناسته د استیناف محکمې د تجارتي دېوان د رئیس محترم مفتي دین محمد (هروي) لخوا د قرآنکریم د مبارکو ایاتونو په تلاوت پیل شوه، ورپسې د مرافعه محکمې عمومي رئیس محترم مولوي عبدالله (قادري) هرات ولایت ته د سترې محکمې د رئیس محترم شیخ عبدالحکیم (حقاني) صاحب له سفر د مننې او ښه راغلاست ترڅنګ محترم قاضي القضات صاحب ته د هرات د محاکمو اړوند قضائي او اداري کارکوونکو د صادقانه خدمت په اړه بشپړ معلومات ورکړل.
دغه راز د سترې محکمې رئیس او قاضي القضات محترم شیخ عبدالحکیم (حقاني) صاحب په دې ناسته کې چې د هرات ولایت د استیناف محکمې د دېوانونو، ابتدائیه محاکمو ټولو قضائي او اداري منسوبینو په کې ګډون درلود وویل، دا چې قضاء یو لوی مسؤولیت دی نو له ټولو قضائي منسوبینو هیله لرم چې د الله تعالی د رضا لپاره په ښه ډول د دغه لوی مسؤولیت د اداء کولو په برخه کې هڅې وکړي، پر رسمي وخت سربېره هم د قضائي چارو د ترسره کولو لپاره کار وکړي.
محترم شیخ عبدالحکیم (حقاني) صاحب د ابتدائیه محاکمو قضائي کارکوونکو ته هدایت وکړ چې د فیصلو صادرولو او ورځنیو چارو پر مهال ډېر دقت وکړي، د افغانستان اسلامي امارت د اصولو مطابق د جزائي او مدني قضایایوو په تړاو فیصلې صادرې کړي ترڅو له صادرېدو وروسته نقض نه شي، په دې سره به محاکمو کې د کار تراکم کم شي.
دغه راز د سترې محکمې محترم رئیس او قاضي القضات زیاته کړه، د محاکمو قضائي منسوبین مؤظف دي چې هره اونۍ له زندانونو لیدنه وکړي او د زندانیانو له وضعیت څخه ځان خبر وکړي.
د ناستې په دوام د هرات ولایت د محاکمو اړوند قضائي او اداري کارکوونکو ته د محترم شیخ عبدالحکیم (حقاني) صاحب تر مهمو او ضروري هدایاتو وروسته د هرات ولایت د ښاري ابتدائیه محکمې د رئیس محترم مولوي خدایرحم (خدام) د دې محکمې د اړتیاوو اړوند خبرې وکړې.
ناسته د سترې محکمې د رئیس او قاضي القضات محترم شیخ عبدالحکیم (حقاني) صاحب لخوا د دعا په ویلو پای ته ورسېده.
