د پکتیا ولایت د ښاري ابتدائیه محکمې ریاست د اداري جلسې ناسته تر سره شوه
په ۲۶ / ۱۰ / ۱۴۴۴ هـ.ق نېټه د پکتیا ولایت ښاري ابتدائيه محکمې په ریاست کې د قاضیانو او اداري کارکوونکو تر منځ اداري ناسته تر سره شوه، یاده ناسته د قرآنکریم په مبارکو آیاتونو پیل شوه، ورپسې د ښاري ابتدائیه محکمې رئیس مولوی کلیم الله (قانت حقاني) د ناستې ګډونوالو ته ښه راغلاست وویل.
مولوي کلیم الله (قانت حقاني) په خپلو خبرو کې یادونه وکړه، کله چې د ښاري ابتدائيه محکمې ریاست له خوا له اړوند دېوانونو څخه اونیز، میاشتنی، ربعوار او کلني راپورونه غوښتل کیږي باید په وخت سره رسیدګي ورته وشي او راپور دې ښاري ابتدائيه محکمې ریاست ته په وخت سره راولیږل شي.
ښاغلي قانت مولوي صاحب د شهادت په مورد د مجلس ګډونوالو ته سپارښتنې وکړې او زیاته یې کړه هر کله چې کوم کس د دواوینو لخوا د شهادت په موخه راغوښتل کیږي باید د شاهدي ټول الفاظ یې په سکون او آرام ډول واورېدل شي او د شاهدي الفاظ یې ټکي په ټکي د کاغذ پر پاڼه ولیکل شي او همدارنګه په دوسیو کې یې د منقولو اموالو د تضمین په ډول د اخیستلو د مخنیوي په هکله خبرې وکړې.
ناسته د دعائیې په ویلو سره پای ته ورسېده.
