د پکتیکا ولایت وازه خوا ولسوالۍ ابتدائیه محکمې د مسؤولينو په هڅو د قتل موضوع حل او فصل شوه
د پکتیکا ولایت وازه خوا ولسوالۍ ابتدائیه محکمې د مسؤولینو په ډېرو هڅو او د قومي مشرانو په منځګړیتوب په ۲۵/ ۱۰/ ۱۴۴۶هـ ق نېټه د قتل موضوع د سولې له لارې حل او فصل شوه.
یاده موضوع شپږ میاشتې مخکې د پکتیکا ولایت وازه خوا ولسوالۍ جانخېلو کلي کې د دوو کورنیو ترمنځ د یوې حقوقي دعوې په سر رامنځته شوې وه؛ چې له امله یې یو تن وژل شوی و.
دغه موضوع محکمې ته تر راجع کېدو وروسته په غور وڅېړل شوه؛ ورپسې د وازه خوا ولسوالۍ ابتدائيه محکمې مسؤولينو د قاتل او مقتول کورنۍ سولې ته وهڅول، له ډېرو هڅو او ترغیب وروسته جانبینو سولې ته غاړه کېښوده.
په دې موخه جوړه شوې غونډه کې چې د محکمې مسؤولینو، قومي مشرانو او سپینږیرو په کې ګډون درلود؛ د مقتول وارثینو ته دیت ورکړل شو او دغه موضوع په رسمي ډول حل او فصل شوه.
