د میدان وردګ ولایت سیدآباد ولسوالۍ کې یوه متهم ته تعزیري سزا ورکړل شوه
د میدان وردګ ولایت د سیدآباد ولسوالۍ د ابتدائیه محکمې د پرېکړې له مخې دوشنبه (۲ /۵ / ۱۴۴۶هـ ق) نېټه یو کس ته چې پر لواطت متهم و، په عام محضر کې تعزیري سزا ورکړل شوه.
پر یاد متهم د تعزیري سزا د تطبیق په موخه جوړه شوې غونډه کې د میدان وردګ ولایت د مرافعه محکمې رئیس محترم مولوي عبدالله (فرقاني)، د سیدآباد ولسوالۍ د ابتدائیه محکمې رئیس مولوي میرحسن (افتخار) او قضائي غړو، د سیدآباد ولسوال ملا عبدالغني اخندزاده، د یو شمېر نورو امارتي ادارو مسؤولینو او عامو هېوادوالو ګډون درلود.
غونډه د قرآنکریم د مبارکو آیاتونو په تلاوت پیل شوه؛ ورپسې د سیدآباد ولسوالۍ ابتدائیه محکمې رئیس مولوي میرحسن (افتخار)، د سیدآباد ولسوال ملا عبدالغني اخندزاده او نورو علماء کرامو د اسلامي نظام، د تعزیري سزاګانو د تطبیق د ګټو، انساني خواهشاتو د زیانونو او د نبوي سنتو مطابق د ژوند تېرولو په اړه خبرې وکړې.
د ناستې ګډونوالو ته د علماء کرامو تر ویناوو وروسته متهم ته تعزیري سزا ورکړل شوه.
د یادونې وړ ده چې یاد متهم د سیدآباد ولسوالۍ د ابتدائیه محکمې لخوا په دوه کاله تنفیذي بند او ۳۹ دُرو تعزیري سزا محکوم شوی و او د تعزیري سزا دغه حکم د سترې محکمې د عالي مقام له تائید وروسته پر متهم تطبیق شو.
