د کندهار ولايت مرافعه محکمې رئيس د یاد ولايت له زندان څخه ليدنه وکړه

د کندهار ولایت مرافعه محکمې رئيس محترم شیخ غلام حضرت (ابوالمنذر) په مشرۍ؛ يو پلاوي چې د ولايت مقام مرستیال، د استخباراتو ریاست رئیس، د عدلیې، د امربالمعروف او نهې عن المنکر، امنیه قوماندانۍ،  پوهنې او د حج او اوقافو ریاستونو استازو په کې ګډون درلود، په ۷/ ۳/ ۱۴۴۷ هـ ق نېټه د یاد ولایت له زندان څخه لیدنه وکړه.
د ليدنې په پيل کې ياد پلاوي د زندان له مسؤولینو سره ناسته وکړه، په ناسته کې د بنديانو پر ستونزو او حل لارو يې بحث وشو.
د مرافعه محکمې رئيس لخوا د محبس مسؤولینو ته د بندیانو د تعلیم او تربیې مهالوېش ورکړل شو؛ تر څو د یاد مهالو ش له مخې د مجربو علماوو او استادانو لخوا تدریس ورکړل شي.
دغه راز یاد پلاوي د ښځو له محبس څخه هم لیدنه وکړه، د هغوی ستونزې او غوښتنې يې واورېدې او مسؤولینو ته د یادو غوښتنو د پوره کولو په اړه لازم هدایات وکړل.
د یادونې وړ ده چې یاد پلاوي په ۳ /۳ /۱۴۴۷ هـ ق نېټه پر نشه يي توکو د روږدو له زندان څخه هم لیدنه کړې وه؛ د بندیانو ستونزې يې له نږدې اورېدلې وي او د ستونزو د حل اړه مسؤولينو ته لازم هدایات کړي وو.