په کونړ ولايت کې د دوو کورنيو ترمنځ (۵۰) کلنه دښمني حل او پای ته ورسېده
د کونړ ولایت د دره پیج ولسوالۍ ابتدائیه محکمې رئيس محترم مولوي محب الله (سلمان) په ډېرو هڅو؛ د یادې ولسوالۍ ولسوال او قومي مشرانو په منځګړيتوب، یوه لویه دښمني چې (۵۰) کاله مخکې په دغه ولایت کې د دوو کورنیو ترمنځ رامنځته شوې وه؛ په ۲۰/ ۲/ ۱۴۴۷هـ ق نېټه حل او پای ته ورسېده.
د یادې دښمنۍ د پای ته رسېدو او حل په موخه جوړه شوې غونډه کې د بېلابېلو ادارو رئيسانو او قومي سپینږیرو لنډې ویناوې وکړې.
د غونډې په دوام د ابتدائیه محکمې رئیس محترم مولوي محب الله (سلمان) د غونډې ګډونوالو ته د محکمې لخوا صادره شوې اصلاحي فیصله واوروله؛ جانبینو په دې فیصله رضایت او خوښي څرګند کړل او یاده دښمني په رسمي ډول پای ته ورسېده.
د سیمې قومي مشرانو او د ناستې ګډونوالو د محکمې او نورو امارتي ادارو له مسؤولینو خوښي څرګنده کړه او دوی ته یې د عزت او وقار پګړۍ ور په سر کړې.
غونډه د دعاء په ویلو پای ته ورسېده.
