په کابل ولايت کې (۶۵) کیلو د انسان ویښتان وسوځول شول
د کابل ولایت اړوند د چهارآسیاب ولسوالۍ ابتدائیه محکمې په حکم (۶۵) کیلو د انسان ویښتان؛ په ۲۲ /۶ / ۱۴۴۷ هـ ق نېټه وسوځول شول.
یاده اندازه ویښتان د امنيتي ځواکونو د عملیاتو پر مهال نيول شوي وو او وروسته يې دوسیه محکمې ته راجع شوه.
د ابتدائیه محکمې لخوا د ویښتانو د سوځولو حکم د تطبیق پر مهال د ابتدائیه محکمې، د فرامینو او احکامو د تطبیق څخه د نظارت، د امربالمعروف نهی عن المنکر او شکایاتو اورېدو او د قومندانۍ استازو په ګډون، یاده اندازه ویښتان وسوځول شول.
د ابتدائیه محکمې مسؤولینو ټینګار وکړ چې د انسان د ویښتانو ناقانونه راټولول او ساتل غیر شرعي او غیرقانوني عمل دی او ورته قضيې به په راتلونکې کې هم تعقيب او وڅېړل شي.
