د هلمند ولايت مارجې ولسوالۍ ابتدائیه محکمې د مسؤولينو په هڅو د قتل موضوع حل شوه
د هلمند ولايت مارجې ولسوالۍ ابتدائیه محکمې د مسؤولينو په ډېرو هڅو او ترغيب، د قومي مشرانو او سپينږېرو په منځګړيتوب په ۱۲/ ۱۱/ ۱۴۴۶ هـ ق نېټه د دوو کورنيو ترمنځ د قتل درې کلنه موضوع د سولې له لارې حل او فصل شوه.
یاده موضوع درې کاله مخکې په مارجې ولسوالۍ کې رامنځته شوې وه او يو کس په کې وژل شوی و؛ ابتدائیه محکمې ته تر راجع کېدو وروسته یاده موضوع په ډېر غور او دقت وڅېړل شوه.
یاده موضوع په يوه اصلاحي غونډه کې چې قومي مشرانو هم په کې ګډون درلود؛ د مقتول د وارثینو لخوا له قاتل څخه د دیت په اخیستو حل شوه، د مقتول وارثينو په دغه اندازه پیسو قناعت وکړ او موضوع يې رسماً پای ته ورسېده.
د غونډې په وروستيو کې دواړو طرفونو د محکمې، امنيه قوماندانۍ او ولسواليو له مسؤولينو مننه وکړه، خپل رضايت او خوښي يې څرګنده کړه او د دوی د هڅو ستاينه يې وکړه.
