د کابل ولایت د مرافعه محکمې د مسؤولينو په هڅو د دوو کورنيو ترمنځ د قتل موضوع حل شوه

د کابل ولایت د مرافعه محکمې د عمومي رئیس محترم مفتي ذبیح الله (ساجد) او د جزا دېوان سرپرست رئیس مولوي عبدالرازق (عدالت) په ډېرو هڅو، ترغیب او د قومي مشرانو په منځګړيتوب په ۴/۴/ ۱۴۴۶ هـ ق نېټه د قتل موضوع حل او فصل شوه.

د قتل په دې پېښه کې چې په ۱۳۹۹ هـ ش کال کې رامنځته شوې وه؛ د کابل ولایت سروبي ولسوالۍ کې يو نارينه او یوه ښځه وژل شوي وو.

په دې موخه جوړه شوې غونډه کې د مرافعه محکمې مسؤولينو، علماء کرامو، د مدعي او مدعي علیه استازو او قومي مشرانو ګډون کړی و.

غونډه د قرآنکریم د څو مبارکو آیاتونو په تلاوت پیل شوه؛ ورپسې علماوو د بخښنې او يووالي پر ګټو او ثواب ویناوې وکړې، له قومي مشرانو څخه یې د ګډون له امله مننه وکړه او ګډونوالو ته يې نېکې سپارښتنې وکړې.
د غونډې په دوام د مدعي او د مدعي علیه استازو او قومي مشرانو د مقتولینو له وارثينو د بخښنې غوښتنه وکړه او د غونډې ګډونوالو هم د مقتولینو وارثین بخښنې ته وهڅول.

 په پای کې د مقتولینو وارثينو د قاتل کورنۍ ته بخښنه وکړه او دواړه لوريو د محاکمو له هڅو ډېره خوښي څرګنده کړه او د محاکمو له مسؤولينو يې مننه وکړه.

غونډه د دعا په ويلو پای ته ورسېده.