د سترې محکمې د قضاء کتابتون پرانیست غونډه ترسره شوه

د سترې محکمې د رئيس او قاضي القضات محترم شيخ عبدالحکيم (حقاني) صاحب په مشرۍ؛ د سترې محکمې اداري مرستيال محترم شيخ عبدالمالک (حقاني)، د سترې محکمې نظامي مرستيال محترم شيخ خیرجان (خیرخواه)، د لوړو زده کړو وزارت مالي او اداري مرستیال محترم حافظ مولوي محمد حامد (حسیب)، د اطلاعات او کلتور وزارت نشراتي مرستیال محترم مولوي مهاجر (فراهي)، د پوهنې وزارت د ښوونې او روزنې مرستيال محترم شيخ سخاؤالله (سعيد)، د علومو اکاډمۍ د طبيعي او تخنيکي علومو مرستيال شيخ امير جان (ثاقب) او د سترې محکمې د مرکزي ریاستونو او دېوانونو رئيسانو، د قضائي او اداري غړو په ګډون نن پنجشنبه (۲۶/ ۱۰/ ۱۴۴۶ هـ ق) نېټه د قضاء کتابتون د پرانيستې او افتتاح مراسم ترسره شوه.
د قضاء کتابتون د سترې محکمې د بهرنيو، عامه اړيکو او مطبوعاتو ریاست تر چتر لاندې فعاليت کوي؛ د تفسیر، حدیثو، فقهې، قضاء، دعوت، عقیدې، فقهي اصولو، سیرت، حقوقو، قوانینو، تاریخ، فلسفې، اروا پوهنې، ټولنیزو علومو، اقتصاد، سیاست، ادبیاتو او نورو موضوعاتو کتابونو له اړخه يو غني کتابتون دی؛ چې شاوخوا درې زره (۳۰۰۰) عنوانه او (۶۰۵۲) جلده کتابونه لري.
دغه راز په یاد کتابتون کې د ورځپاڼو، جریدو، مجلو او متحدالمآلونو (۷۶) عنوانه او (۶۳۲) جلده بېلابېل کلني کلکسیونونه هم موجود او ساتل شوي دي. 
د قضاء کتابتون د محترم قاضي‌القضات شیخ صاحب په ځانګړې پاملرنه په نوې او عصري بڼه جوړ او د مطالعې لپاره ټولې لازمې اسانتیاوې په کې برابرې شوې دي.