د سترې محکمې په انګړ کې د اودسونو ځای جوړ او ګټې اخيستنې ته وسپارل شو
د سترې محکمې د اداري مرستيال محترم شيخ عبدالمالک (حقاني) صاحب لخوا د سترې محکمې په انګړ کې د اودسونو لپاره جوړ شوی ځای نن د چهارشنبې په ورځ د روان ۱۴۴۶ هـ ق کال د صفرالمظفر مياشتې په ۳ مه نېټه پرانېستل شو.
د پرانېستې په دې غونډه کې اداري مرستيال محترم شيخ عبدالمالک (حقاني) صاحب، مالي او اداري رياست عمومي رئيس محترم الحاج مولوي کريم الله (زاهد) يو شمېر رئيسانو، کارکوونکو او مراجعينو ګډون کړی و.
په دې غونډه کې اداري مرستيال محترم شيخ عبدالمالک حقاني وويل، د سترې محکمې د رهبرۍ تل هڅه دا وي چې د ټولو محاکمو ستونزو او غوښتنو ته په هره برخه کې په خپل وخت رسېدنه وکړې او اړتياوې يې پوره کړې.
محترم حقاني صاحب، په خپلو خبرو کې د مالي او اداري چارو رياست اړونده کارکوونکو د چارو او کارونه ستاينه وکړه او د هڅونې په موخه يې دوی په نغدي ډاليو ونازول.
د غونډې په وروستيو کې مراجعينو او کارکوونکو د سترې محکمې له رهبرۍ مننه وکړه چې تل یې دوی ته په هره برخه کې لازم سهولتونه او اسانتياوې رامنځته کړې دي.
د پرانېستلو یاد مراسم د دعاء په ويلو پای ته ورسېدل.
