د روزګان ولايت د محاکمو د مسؤولينو په هڅو د قتل موضوع حل او فصل شوه

د روزګان ولایت د مرافعه محکمې رئیس محترم مولوی سخیداد (ابوالتقي)؛ د چورې ولسوالۍ ابتدائیه محکمې د حقوقو مدیر مفتي عبدالودود په دوامداره هڅو او قومي مشرانو په منځګړیتوب په ۲۶ /۱۲ /۱۴۴۶هـ ق د قتل موضوع چې یو کال مخکې رامنځته شوې وه؛ حل او فصل شوه.
د قتل دغه موضوع د یاد ولايت مرکز ترینکوټ سفید خار کلي کې د دوو کورنیو ترمنځ رامنځته شوې وه؛ چې محکمې ته تر راجع کېدو وروسته په غور او دقت وڅېړل شوه.
 ورپسې د محاکمو مسؤولینو د قضیې دواړه لوري سولې ته وهڅول او له ډېرو هڅو وروسته د مقتول وارثینو سولې ته غاړه کېښوده.
 په دې موخه جوړه شوې غونډه کې د مرافعه محکمې رئیس او د مدني دېوان مفتي عبدالباري، د ابتدائیه محکمې رئیس محترم مولوي جان محمد، نورو مسؤولینو او قومي مشرانو ګډون درلود.
غونډه کې ګډونوالو د اسلامي نظام د بقا او موضوع اړوند هر اړخيزې ویناوې وکړې؛ ورپسې اصلاحي فیصله واورول شوه، یاده موضوع د دواړو کورنيو په رضایت او خوشحالۍ پای ته ورسېده او یو کلنه دښمني یې په دوستۍ بدله شوه.
 د غونډې په وروستیو کې دواړو کورنيو او قومي مشرانو د مسؤولینو د هڅو ستاینه وکړه او د الله (جل جلاله) له درباره څخه ورته د ښه خدمت د توفیق غوښتنه وکړه.