د قضائي تفتیش عمومي ریاست مفتشینو د غور ولایت له محاکمو او مرکزي زندان څخه لیدنه وکړه
د عالیقدر امیرالمؤمنین (حفظهاللهتعالی) او د سترې محکمې د عالي مقام د هدایت په اساس د قضائي تفتیش عمومي رئیس محترم شیخ عبدالرحمن (فراهي) په مشرۍ يوه هيئت؛ چې مفتي محمد اسلام (مسلم)، مولوي عبدالظاهر (لقماني) او مفتي فیض الرحمن (نثار) يې غړیتوب درلود، د روان ۱۴۴۸هـ ق کال د محرم الحرام میاشتې په ۲مه نېټه د جنوب لوېديځ زون اړوند غور ولایت ته د محاکمو د تېرو فعالیتونو د څېړلو په موخه سفر وکړ.
د ليدنې په پیل کې یاد هيئت د غور ولایت د مرافعه محکمې له رئيس سره وکتل، ورپسې يې د بندیانو د ستونزو د څېړلو په موخه د یاد ولایت له مرکزي زندان او توقیفخانو څخه لیدنه وکړه، د یاد محبس د ټولو نارینهوو، ښځینهوو او محجوزینو بندیانو بشپړ شهرت، کیفیت او شکایتونه يې له ځان سره یادداشت او بیا یې له اړونده محاکمو سره شریک کړل.
یاد هيئت د خپل کاري پلان له مخې د یاد ولایت ( 12) ولسوالیو د ابتدائیه محاکمو، د حقوقو مدیریتونو، د ښاري او مرافعه محاکمو اړونده دېوانونو، د وثایقو او حقوقو آمریتونو، نظامي او اختصاصي محاکمو څخه په جلا جلا توګه د خپل طرزالعمل مطابق هيئتي وکړه.
نوموړي هیئت د پلټنې بهیر په ترڅ کې د یادو محاکمو د قضائي، اداري او مالي چارو هر اړخیزه پلټنه ترسره کړه، د محاکمو د قضائي او اداري پرسونل د سلوکي او مسلکي اړخونو معلومات يې واخیستل او د چارو د سمون په برخه کې ورته لازمې لارښوونې وکړې.
دغه هیئت د محاکمو اړوند شته ستونزې، کاري خنډونه او نېمګړتیاوې له ځان سره یاداشت او په پای کي يې د ستونزو د حل، د خنډونو له منځه وړلو او دنېمګړتیاوو د اکمال په اړه د غور ولایت د مرافعه او ښاري ابتدائيه محاکمو له قضائي مسؤولینو سره تفاهمي ناسته وکړه او ټولې ستونزې يې په جلا جلا توګه ورسره شریکې کړې.
د پلټنې هيئت د خپل سفر په جریان کې د یاد ولایت د استخباراتو له رئیس، علماوو شورا ټولو غړو سره په اجتماعي توګه او د ولسوالیو مسؤولینو سره ناستې وکړې او د محاکمو د فعالیتونو د لا ښه پرمختګ او د ځينو ستونزو د حل په موخه يې د هغوی نظرونه واورېدل.
د قضائي پلټنې هیئت یاد سفر د ۱۴۴۸هـ ق کال د محرم الحرم میاشتې په ۲۰مه نېته پای ته ورسېد.
